వైసీపీని వీడనున్న దగ్గుబాటి వెంకటేశ్వరరావు?

ఎన్టీఆర్ పెద్దల్లుడు, సీనియర్ నేత దగ్గుబాటి వెంకటేశ్వరరావు వైఎస్సార్సీపీకి వీడనున్నట్లు వార్తలొస్తున్నాయి. దగ్గుబాటి వైఎస్సార్సీపీలో ఉండగా.. ఆయన భార్య పురందేశ్వరి బీజేపీలో కొనసాగుతున్నారు. ఇద్దరూ వేర్వేరు పార్టీల్లో ఉండడం.. పురందేశ్వరి వైఎస్సార్సీపీ ప్రభుత్వంపై విమర్శలు చేయడాన్ని సీఎం జగన్ సీరియస్‌గా తీసుకున్నట్లు తెలుస్తోంది. ఇద్దరూ వేర్వేరు పార్టీల్లో ఉండడం తగదని, పురందేశ్వరిని కూడా వైఎస్సార్సీపీలోకి తీసుకురావాలని దగ్గుబాటికి సీఎం జగన్ సూచించినట్లు సమాచారం. పురందేశ్వరి పార్టీలో చేరితే సముచిత స్థానం కల్పిస్తామని హామీ ఇచ్చినట్లు కూడా వార్తలొచ్చాయి. ఈ విషయంలో వైసీపీ అధిష్టానం నుంచి ఒత్తిడి ఎక్కువవడంతో పార్టీని వీడాలని దగ్గుబాటి నిర్ణయించుకున్నట్టు సమాచారం.ఇదే విషయాన్ని ఇప్పటికే సీఎం జగన్‌కు చెప్పినట్లుగా తెలుస్తోంది. మరో రెండు మూడు రోజుల్లో అధికారిక ప్రకటన వచ్చే అవకాశం ఉందని ప్రకాశం జిల్లా వైఎస్సార్సీపీ వర్గాలు పేర్కొంటున్నాయి. కేవలం వైఎస్సార్సీపీ నుంచి వైదొలగడమే కాకుండా రాజకీయాలకు పూర్తిగా దూరంగా ఉండాలనే ఆలోచనలో దగ్గుబాటి ఉన్నారని ప్రచారం జరుగుతోంది. కుటుంబ సభ్యులతో చర్చించిన అనంతరం దగ్గుబాటి ఈ నిర్ణయానికి వచ్చినట్టు తెలుస్తోంది.ఈ నేపథ్యంలో శనివారం పర్చూరు వైఎస్సార్సీపీ శ్రేణులు సమావేశమయ్యాయి. సుమారు 2 వేల మంది పాల్గొన్న సమావేశానికి దగ్గుబాటి కూడా వస్తారని ఆశించినప్పటికీ ఆయన హాజరుకాలేదు. దీంతో ఆయన అభిమాని ఒకరు ఆత్మహత్యాయత్నానికి పాల్పడ్డారు. దగ్గుబాటి వైదొలగితే పార్టీ పగ్గాలు మాజీ ఇన్‌చార్జి గొట్టిపాటి భరత్‌కు అప్పగించాలని పార్టీ కార్యకర్తలు డిమాండ్ చేస్తున్నారు.గత ఎన్నికల్లో ప్రకాశం జిల్లా పర్చూరు నుంచి వైఎస్సార్సీపీ ఎమ్మెల్యే అభ్యర్థిగా పోటీ చేసిన దగ్గుబాటి స్వల్ప తేడాతో టీడీపీ అభ్యర్థి చేతిలో ఓటమి పాలయ్యారు. అప్పటి నుంచి నియోజకవర్గ శ్రేణులకు కాస్త దూరంగా ఉంటున్నారు. దీంతోపాటు ఎన్నికలకు ముందు పార్టీ నుంచి బయటికి వెళ్లిపోయిన రామనాథంబాబును మళ్లీ పార్టీలో చేర్చుకోవడం కూడా దగ్గుబాటి వర్గాన్ని తీవ్రంగా వ్యతిరేకిస్తోంది.