పెళ్లికి కూడా ఇన్సూరెన్స్.. వివరాలివే

ఏదైనా కారణం చేత జరగాల్సిన వివాహం రద్దవ్వడం లేదా వాయిదా పడటం జరిగితే ఎంతో కొంత ఆర్థికంగా నష్టం ఏర్పడుతుంది. అయితే ఇలా ఏర్పడే ఆర్థిక నష్టాన్ని నివారించడానికి వివాహ బీమాను చేయించుకోవచ్చు. వివాహ భీమామొత్తం అనేది మీ పెళ్లి బడ్జెట్‌పై ఆధారపడి ఉంటుంది. బీమాపై విధించే ప్రీమియం మొత్తం బీమా మొత్తంలో 0.7-2% మధ్య ఉంటుంది. రూ.10 లక్షల వివాహ బీమా పొందాలంటే రూ.7,500 నుంచి రూ.15,000 వరకు ప్రీమియం చెల్లించాల్సి ఉంటుంది. వివాహాలు వాయిదా లేదా రద్దు చేయాల్సిన పరిస్థితి ఏర్పడినప్పుడు వివాహ బీమా మీరు చేసిన మేజర్ ఖర్చులను కవర్ చేస్తుంది.

Coverage of Liabilities: కొన్ని సార్లు వివాహాల సందర్భంగా ప్రమాదాలు, అపశృతులు చోటు చేసుకుంటాయి. ప్రమాదం లేదా గాయం కారణంగా పెళ్లి వేడుకలో ఎవరికైనా నష్టం వాటిల్లితే ఈ కేటగిరీకి చెందిన ఇన్సూరెన్స్ దానిని కవర్ చేస్తుంది.

Cancellation Coverage: పెళ్లిని ఆకస్మికంగా లేదా ఊహించని కారణంతో రద్దు చేయడం వల్ల కలిగే నష్టాలను ఈ కేటగిరీ కవర్ చేస్తుంది.

Damage to Property: వివాహ వేడుకల్లో కొన్ని సార్లు అనుకోని ప్రమాదం జరిగి ఆస్తి నష్టం వాటిల్లుతుంది. ఈ కేటగిరీ అలాంటి నష్టాలను కవర్ చేస్తుంది.

Personnel Accident: ఈ కేటగిరీ ప్రమాదం కారణంగా వధూవరుల ఆసుపత్రికి అయ్యే ఖర్చును కవర్ చేస్తుంది.

వివాహానికి సంబంధించిన బీమా ఈ కింది ఖర్చులను కవర్ చేస్తుంది..

1. క్యాటరింగ్ కోసం ఇచ్చిన అడ్వాన్స్.

2. పెళ్లి వేదిక కోసం ముందస్తుగా చెల్లించిన అడ్వాన్స్.

3. ట్రావెల్ ఏజెన్సీలకు చేసిన ముందస్తు చెల్లింపులు.

4. హోటల్ గదులను బుక్ చేయడానికి ఇచ్చిన అడ్వాన్స్.

5. వివాహ డెకరేషన్ కు అయిన ఖర్చు

6. మ్యారేజ్ లో ఎంటర్టైన్మెంట్ కోసం ఏర్పాటు చేసిన కచేరి, డ్యాన్స్ ప్రోగ్రామ్స్ కోసం ఇచ్చిన అడ్వాన్స్

7. అలంకరణ మరియు వివాహ సెట్ కి చేసిన ఖర్చు.

వివాహ వేడుకకు ముందు కానీ, జరుగుతున్న సమయంలో కానీ అనూహ్య సంఘటన జరిగితే మీరు వెంటనే భీమా సంస్థకు సమాచారం ఇవ్వాలి. అనంతరం బీమా కంపెనీ వాస్తవాలను పరిశీలిస్తుంది. మీకు జరిగిన నష్టం సరైన కారణంతో అని వారు నిర్ధారిస్తే ఆ ఖర్చు మీకు తిరిగి చెల్లించబడుతుంది.

ఉగ్రవాద దాడి, సమ్మె, వధూవరుల కిడ్నాప్, పెళ్లికి వచ్చిన బంధువుల దుస్తులు, వ్యక్తిగత వస్తువులు కోల్పోవడం, వివాహ వేదిక ఆకస్మికంగా అందుబాటులో లేకపోవడం, పాలసీదారుడి ఆదేశానుసారమే పెళ్లి వేదికకు నష్టం వాటిల్లడం వంటి సందర్భాల్లో క్లెయిమ్‌లకు ఎలాంటి పరిహారాన్ని ఇన్సూరెన్స్ కంపెనీలు చెల్లించవు. నిర్లక్ష్యం లేదా పర్యవేక్షణ లేకపోవడం వల్ల ఆస్తి నష్టం జరిగినట్లు కూడా నిర్ధారణ అయితే వారికి ఎలాంటి పరిహారాలు చెల్లించబడవు.