ఆ మహిళా జడ్జ్ కు తిరిగి విధుల్లోకి తీసుకోండి: సుప్రీం ఆదేశం

తన ఉద్యోగానికి రాజీనామా చేసిన ఓ మహిళా జడ్జ్ ను తిరిగి విధుల్లోకి తీసుకోవాలని సుప్రీం కోర్టు ఆదేశించింది. హైకోర్టు న్యాయమూర్తి లైంగిక వేధింపులకు పాల్పడ్డారని ఆరోపిస్తూ 2014లో రాజీనామా చేసిన మహిళా జిల్లా అడిషినల్ జడ్జిని తిరిగి విధుల్లోకి తీసుకోవాలని సుప్రీంకోర్టు గురువారం ఆదేశించింది. ఆరోపణలు కారణంగా 2014లో ఆమె బలవంతంగా రాజీనామా చేయాల్సి వచ్చిందని, తిరిగి విధుల్లోకి తీసుకోవాలని జస్టిస్ ఎల్ నాగేశ్వరరావు, జస్టిస్ బీఆర్ గవాయ్‌ల ధర్మాసనం ఈ మేరకు తీర్పు వెలువరించింది. ఆమె రాజీనామాను ఆమోదించిన ఉత్తర్వులను కొట్టివేసిన ధర్మాసనం.. మధ్యప్రదేశ్ జ్యుడీషియల్ విభాగంలో అదనపు జిల్లా న్యాయమూర్తిగా ఆమెను తిరిగి నియమించాలని ఆదేశించింది. అయితే, ఆమెకు తిరిగి పోస్టింగ్ ఇచ్చినా.. ఈ మధ్యకాలంలో వేతనాలు పొందడానికి మాత్రం అర్హురాలు కాదని పేర్కొంది. డిసెంబరు 15, 2017 నాటి న్యాయమూర్తుల విచారణ కమిటీ నివేదికలో వేరే మార్గం లేక తాను 2014 జులై 15లో అదనపు జిల్లా జడ్జి పదవికి రాజీనామా చేసినట్టు పేర్కొన్న అంశాన్ని హైకోర్టు విస్మరించిందని మహిళ తన పిటిషన్‌లో పేర్కొంది. హైకోర్టు జడ్జి తనను లైంగికంగా వేధించారని ఆరోపిస్తూ 2014 జులైలో రాష్ట్రపతి, సుప్రీంకోర్టు ప్రధాన న్యాయమూర్తి, కేంద్ర న్యాయశాఖ మంత్రి ఆమె లేఖలు రాశారు. అప్పటికి గ్వాలియర్ అదనపు జిల్లా జడ్జిగా ఉన్న ఆమె తన పదవికి రాజీనామా చేశారు. జడ్జ్ తనను ఐటెమ్ సాంగ్‌కు డ్యాన్స్ చేయమని కోరారని, తన పలుకుబడిని ఉపయోగించి మారుమూల ప్రాంతానికి బదిలీ చేశారని ఆరోపించారు. న్యాయమూర్తిపై వచ్చిన ఆరోపణలపై విచారణకు రాజ్యసభ ఓ కమిటీని నియమించింది. విచారణ జరిపిన ఈ కమిటీ హైకోర్టు న్యాయమూర్తికి క్లీన్ చిట్ ఇచ్చింది. ఫిర్యాదుదారుని వేధించడానికి కిందిస్థాయి న్యాయవ్యవస్థను ఉపయోగించుకుని ఆయన పదవిని దుర్వినియోగం చేశారనే అభియోగంలో ఎటువంటి ఆధారాలు లభించలేదని తెలిపింది.