నల్ల బియ్యానికి పెరుగుతున్న డిమాండ్...రెండు చేతులతో రైతన్న సంపాదన

పంట వేయాలనుకొంటే రైతన్నకు భయాందోళనలకు గురిచేస్తున్న ప్రస్తుత పరిస్థితుల్లో చత్తీస్ ఘడ్ రైతులకు మాత్రం నల్ల బియ్యం వరంగా మారుతోంది. చత్తీస్‌ ఘడ్ అంటే వరి సాగుకు బాగా ప్రాచుర్యం. పుష్కలమైన వరి ధాన్యాలు ఇక్కడ పండుతాయి. ఇక్కడ బియ్యం కొరతనేదే ఉండదు. ఇక్కడ రైతులు ఒకటికి మించిన రకాల వరి సాగును చేపడతారు. ఇటీవల మారుతోన్న ఆహారపు అలవాటల్లో ప్రజలు నల్ల బియ్యాన్ని బాగా కొంటున్నారు. కస్టమర్ల నుంచి పెరుగుతోన్న డిమాండ్‌ను అందిపుచ్చుకుంటూ.. చత్తీస్ ఘడ్ రైతులు నల్ల బియ్యం, ఎర్ర బియ్యాన్ని ఎక్కువగా పండిస్తూ రెండింతల లాభాలను ఆర్జిస్తున్నారు. నల్ల, ఎర్ర బియ్యాన్ని పూర్తిగా సేంద్రీయ పద్ధతులో సాగు చేస్తున్నట్టు రాయ్‌పూర్‌లోని సైన్స్ కాలేజీ గ్రౌండ్స్‌లో జరిగిన ఎగ్జిబిషన్‌లో పాల్గొన్న మహాసముంద్ జిల్లాకు చెందిన రైతులు చెప్పారు. ఈ బియ్యం సాగులో రసాయనాల నుంచి ఎరువుల వరకు ప్రతిదీ ఆర్గానిక్‌గానే ఉంటున్నట్టు పేర్కొన్నారు. ఈ పంట సాగు కోసం కేవలం ఆర్గానిక్ ఉత్పత్తులనే వాడుతున్నట్టు చెప్పారు. సాధారణ వరి సాగు మాదిరిగానే ఈ ఎర్ర, నల్ల బియ్యానికి చెందిన సాగు ఉంటుందని రైతులు చెబుతున్నారు. పూర్తిగా సేంద్రీయ పద్ధతిలో జరిగే ఈ పంట బియ్యానికి బాగా ఆర్డర్లు పెరుగుతుండటంతో.. ఆర్డర్లను అందిపుచ్చుకోవడం కోసం చత్తీస్ ఘడ్ రైతులు ఈ వరిని ఎక్కువగా సాగు చేస్తున్నారు. పంట దిగుమతి తక్కువగా ఉన్న మార్కెట్లో ఈ బియ్యానికి మంచి ధర పలుకుతోంది. కేజీ నల్ల, ఎర్ర బియ్యం ఖరీదు రూ.100 నుంచి రూ.125గా ఉంటోంది. దీంతో ఈ పంటను సాగు చేస్తోన్న రైతులకు లాభాలు రెండింతలుగా ఉంటున్నాయి. ఈ పంట కాలం కూడా కేవలం 120 రోజుల నుంచి 140 రోజేలే. సాధారణ బియ్యం సాగులో ఎకరానికి 30 బస్తాల దిగుబడి వస్తే.. ఈ నల్ల, ఎర్ర బియ్యం సాగులో సుమారు 15 బస్తాలు మాత్రమే వస్తోంది. గుండె సంబంధిత వ్యాధులతో పాటు, క్యాన్సర్, షుగర్ వంటి వ్యాధులతో బాధపడుతోన్న వారికి ఈ నల్ల, ఎర్ర బియ్యం సంజీవనిలా పనిచేస్తోంది. సాధారణ తెల్ల బియ్యంతో పోలిస్తే.. ఇందులో ఐరన్, ప్రొటీన్, ఫైబర్, కాపర్, కెరోటీన్ వంటి పోషకాలు అధికంగా ఉంటున్నాయి. అంతేకాక పోషకాహార లోపాన్ని తొలగించడంలో కూడా ఈ బియ్యం బాగా ఉపయోగపడుతోంది.