ప్రపంచ పారిశ్రామిక దిగ్గజాలలో ఒకరిగా...రాహుల్ బజాజ్

రాహుల్ బజాజ్ ఈ పేరు తెలియనివారుండరు. కానీ ఆయన ముక్కుసూటితనంతో తనకంటూ ఒక పేరును తెచ్చుకుని ప్రపంచ పారిశ్రామిక దిగ్గజాలలో ఒకరిగా నిలిచారు. 83 ఏళ్ల వయసులో అనారోగ్య కారణాల చేత శనివారం కన్నుమూశారు. సామాన్య ప్రజల కలను సాకారం చేసిన రాహుల్ బజాజ్.. సామాన్యుల కోసం తన పయనాన్ని కూడా ఒక సాధారణ ప్రాంతంలోనే మొదలు పెట్టారు. ఢిల్లీలో ప్రతిష్టాత్మకమైన సెయింట్ స్టీఫెన్స్ కాలేజీలో, ఆ తర్వాత హార్వర్డ్ బిజినెస్ స్కూల్‌లో చదువుకున్న రాహుల్ బజాజ్.. 1960లో ముంబైలో తన విలాసవంతమైన జీవితాన్ని వదిలిపెట్టి... పుణేలో అకుర్దిలో అడుగుపెట్టారు. మహారాష్ట్రలోని మవాల్ తలూకాలో అకుర్ది ఒక గ్రామం.. ఆయన పయనం ఈ గ్రామం నుంచే ప్రారంభమైంది. అకుర్ది అప్పట్లో ఒక వెనుకబడిన ప్రాంతం. కానీ రాహుల్ బజాజ్ కంపెనీ అకుర్దిలోనే భూములను కొనుగోలు చేసి అక్కడే ఫ్యాక్టరీని తెరిచి ఆర్థిక ప్రయోజనాలను పొందింది. చేతక్ పేరుతో బజాజ్ తీసుకొచ్చిన స్కూటర్‌ను ఈ ఫ్యాక్టరీ నుంచే బజాజ్ రూపొందించింది. ఇది భారత్‌లోని మధ్య తరగతి కుటుంబంలో ఒక భాగంగా మారింది. లక్షలాది మంది దేశ ప్రజల మన్ననలను చేతక్‌ సొంతం చేసుకుంది. ఇదంతా రాహుల్ బజాజ్ వల్లే సాధ్యమనడంలో ఎలాంటి అతిశయోక్తి లేదు. 1970, 80లలో టూవీలర్స్ అంటే బజాజ్ వే కనిపించేవి. కనీస అవసరాలు కూడా లేని ఒక గ్రామీణ ప్రాంతంలో ఫ్యాక్టరీని ఏర్పాటు చేస్తున్నప్పుడు అందరూ అనుకున్నారు ఎక్కువ రోజులు అక్కడ నిలదొక్కుకోలేరని. కానీ వారందరి అభిప్రాయాలను రాహుల్ బజాజ్ తలకిందులు చేశారు. పుణేను ఆయన తన ఇంటిగా మార్చుకోవడమే కాకుండా.. ఆయన చివరి శ్వాస వరకు అక్కడే నివసించారు. దేశంలో ప్రముఖ ఇండస్ట్రియల్ జోన్లలో ఒకటిగా ఈ ప్రాంతం మారింది. బజాజ్ ఆటో కూడా రూ.లక్ష కోట్లకు పైగా మార్కెట్ క్యాప్‌తో ప్రపంచంలోనే అత్యంత లాభాదాయకమైన కంపెనీలలో ఒకటిగా నిలిచింది. నేడు బజాజ్ ఆటో కంపెనీని రాహుల్ పెద్ద కొడుకు రాజీవ్ బజాజ్ నడుపుతున్నారు. కీలకమైన ఎక్స్‌పోర్ట్ మార్కెట్లలో ఇది వ్యాపార కార్యకలాపాలు నిర్వహిస్తోంది. కంపెనీ పల్సర్ భారత్ లో ఐకానిక్ మోటార్‌సైకిల్ బ్రాండ్లలో ఒకటిగా ఉంది.