విద్యుత్ చార్జీలు ఉపసంహరించుకోవాలి: ఏపీ రైతు సంఘం
Andhra Pradesh Telugu | Suryaa Desk | Published : Tue, Apr 05, 2022, 11:53 AM
రాష్ట్ర వ్యాప్తంగా పెంచిన విద్యుత్ చార్జీలను వెంటనే ఉపసంహరించుకోవాలని ఏపీ రైతు సంఘం మండల కార్యదర్శి పోతలయ్య పేర్కొన్నారు. రాప్తాడు మండల కేంద్రంలోని విద్యుత్ శాఖ కార్యాలయం ముందు ఏపీ రైతు సంఘం ఆధ్వర్యంలో రైతులతో కలిసి ఆందోళన, నిరసన కార్యక్రమాన్ని నిర్వహించారు.
వినతి పత్రాన్ని తీసుకోవడానికి విద్యుత్ శాఖ కార్యాలయంలో ఏఈ రమాదేవి అందుబాటులో లేకపోవడంతో ఫోన్ లో సంప్రదించగా ఆమె నిర్లక్ష్యంగా మాట్లాడంతో కనీసం ఇన్చార్జి కూడా లేకపోవడం చాలా దారుణమని రైతు సంఘం నాయకులు ఆగ్రహం వ్యక్తం చేశారు. ఎ. ఈ రూము తలుపుకి వినతిపత్రం అతికించి నిరసన తెలియజేశారు. రాష్ట్ర ప్రభుత్వం రైతాంగాన్ని నట్టేట ముంచి పెట్టుబడిదారులకు కొమ్ము కాస్తోందన్నారు. పుండు మీద కారం చల్లినట్లు విద్యుత్ చార్జీలు పెంచి రైతులకు తీవ్ర అన్యాయం చేస్తోందన్నారు. పెంచిన ఛార్జీలను ఉపసంహరించుకోకపోతే ప్రజా సంఘాలను కలుపుకుని రోడ్లెక్కి ఉద్యమాలు చేసేందుకు సిద్ధంగా ఉన్నామని హెచ్చరించారు. రైతులకు డ్రిప్ స్పింకర్లులు వెంటనే మంజూరు చేయాలని డిమాండ్ చేశారు. కేంద్ర రాష్ట్ర ప్రభుత్వాలు అవలంబిస్తున్న నిరంకుశ వైఖరిని తీవ్రంగా ఖండిస్తున్నామని తెలిపారు. ఈ కార్యక్రమంలో చంద్రశేఖర్ రెడ్డి గాండ్లపర్తి పోతలయ్య నల్లప్ప సుబ్బిరెడ్డి మల్లి రెడ్డి నారాయణస్వామి తదితరులు పాల్గొన్నారు.
|
|