క్లాస్ రూంలో..మద్యం తాగిన విద్యార్థినీలు

కాలం మారుతోంది. మగాడు పట్టే మద్యం గ్లాసును ఇపుడు మహిళలు కూడా పట్టేస్తున్నారు. కానీ విచారకరమైంది ఏమంటే విద్యార్థినీలు మద్యం తాగడం ఆందోళన కలిగిస్తున్న విషయం. తాజాగా తమిళనాడులో కొంతమంది విద్యార్థినులు క్లాస్ రూమ్‌లోనే మద్యం తాగారు. పాఠాలు వినకుండా మందు తాగుతూ ఎంజాయ్ చేశారు. కాంచీపురం పక్కనే ఉన్న ఏనాతూరులోని ఓ ప్రైవేట్ కళాశాలలో కొంతమంది విద్యార్థులు తరగతి గదిలో కూర్చుని దర్జాగా మందు తాగారు. దీనికి సంబంధించిన వీడియో సోషల్ మీడియాలో చక్కర్లు కొట్టింది. ఆ వీడియోలో విద్యార్థులు క్లాస్‌రూమ్‌ టేబుల్‌పై కూర్చుని కూల్ డ్రింక్స్‌లో వైన్‌ కలిపి తాగుతున్న దృశ్యాలు చూడొచ్చు. ఇది సంబంధిత అధికారుల దృష్టికి వెళ్లడంతో అసలు సంగతి తెలుసుకునేందుకు వెంటనే విచారణకు ఆదేశించారు. ఈ పని చేసినది.. ఓ ప్రైవేట్ ఆర్ట్స్ అండ్ సైన్స్ కళాశాలలో బీపీఏ మొదటి సంవత్సరం చదువుతున్న విద్యార్థులు అని విచారణలో తేలింది. పైగా తమ ఫ్రెండే మద్యం తెచ్చాడని, మద్యం అని తెలిసే తాగామని అమ్మాయిలు అంగీకరించారు.

దాంతో కాలేజ్ ప్రిన్సిపాల్ ఐదుగురు విద్యార్థునులను సస్పెన్షన్‌ చేశారు. మరోసారి ఇలాంటి సంఘటనలు జరిగితే కఠిన చర్యలు తీసుకుంటామని హెచ్చరించారు. అలాగే బాలికలకు తగిన కౌన్సెలింగ్ అందించాలని వారి తల్లిదండ్రులకు సూచించారు. అదేవిధంగా విద్యార్థులు ఇకపై ఇలాంటి చర్యలకు పాల్పడకుండా ఉండేందుకు అధికారులు పిల్లలకు అవగాహన కల్పించే పనిలో పడ్డారు. ఇదిలావుంటే గత నెలలో కూడా తమిళనాడులో ఇలాంటి సంఘటన వెలుగులోకి వచ్చింది. కొంతమంది విద్యార్థునులు స్కూలు బస్సులో మద్యం సేవించిన వీడియో ఒకటి బయటకొచ్చింది. తిరుకాజుకుండ్రం నుంచి ఠాచూర్‌కు వెళ్తుండగా కొంతమంది విద్యార్థినులు మద్యం సేవించారు. పోలీసులు సైతం వీడియోను పరిశీలించారు. తర్వాత ఆ అమ్మాయిలు ప్రభుత్వ పాఠశాల విద్యార్థులుగా తెలిసింది. ఆ ఘటనపై అధికారులు పూర్తిస్థాయిలో విచారణ జరుపుతున్నారు. అదేవిధంగా నాలుగేళ్ల క్రితం కర్ణాటకలోని తుమకూరు జిల్లాలోని ఓ ప్రభుత్వ ఉన్నత పాఠశాల లెక్చరర్లు, ప్రిన్సిపాల్ పిక్నిక్‌లో విద్యార్థులకు మద్యం ఇచ్చారనే ఆరోపణలు వచ్చాయి. విద్యార్థులు దాహం కోసం నీళ్లు అడిగితే వారికి మద్యం ఇచ్చారు. దీనిపై అధికారులు చర్యలు తీసుకున్నారు.