యుద్ధం ఆపే ప్రసక్తే లేదు: పుతిన్
international | Suryaa Desk | Published : Wed, Apr 13, 2022, 12:07 PM
ఉక్రెయిన్తో యుద్ధం(సైనిక చర్య) ఆపే ప్రసక్తే లేదని రష్యా అధ్యక్షుడు పుతిన్ స్పష్టం చేశారు. తమపై విధించిన అమెరికా, యూరప్ దేశాల ఆంక్షలు ఆయా దేశాలకే తిప్పికొడతాయని అభిప్రాయపడ్డారు. రష్యాను విదేశీ శక్తులు ఒంటరి చేయలేవని తెలిపారు. బెలారస్ అధ్యక్షుడు లుకషెంకోతో కలిసి తూర్పు రష్యాలోని వొస్తోచ్నీ స్పేస్ లాంచ్ స్టేషన్ను పుతిన్ మంగళవారం సందర్శించారు. ఈ సందర్భంగా కీలక వ్యాఖ్యలు చేశారు. రష్యా, బెలారస్ నుంచి ఎరువుల ఎగుమతులను పాశ్చాత్య దేశాలు అడ్డుకుంటున్నాయన్నారు. అలా చేస్తే చాలా దేశాల్లో ఎరువుల ధరలకు రెక్కలు వస్తాయని, అది ఆహార సంక్షోభానికి దారి తీస్తుందని చెప్పారు.
తమపై నిషేధం వల్ల పాశ్చాత్య దేశాలు నష్టపోతాయని పేర్కొన్నారు. ప్రణాళిక ప్రకారం ఉక్రెయిన్పై సైనిక చర్య కొనసాగుతోందని, లక్ష్యం చేరుకునేంత వరకు వెనుకడుగు వేసేది లేదని చెప్పారు. ఇదిలా ఉండగా యుద్ధ సమాచారాన్ని పశ్చిమ దేశాలకు సొంత దేశ సైనికాధికారులే లీక్ చేయడం కలకలం రేపింది. తమ యుద్ధ వ్యూహాలను గంటల వ్యవధిలోనే బ్రిటన్ బాహాటంగా వెల్లడించడంపై రష్యా కంగుతింది. విచారణ చేపట్టి, 150 మందికి పైగా సైనిక, నిఘా ఉన్నతాధికారులను అదుపులోకి తీసుకుంది.
|
|