మిలట్రీలో సైబర్ సెక్యూరిటీ ఉల్లంఘన: ఇంటలిజెన్స్ నివేదిక
national | Suryaa Desk | Published : Tue, Apr 19, 2022, 11:50 PM
భారతదేశ భద్రత విషయంలో ఆందోళన కలిగించే విషయాన్ని ఇంటలిజెన్స్ అందించింది. మిలట్రీలో సైబర్ సెక్యూరిటీ ఉల్లంఘన జరిగినట్టు తెలియజేసింది. దాయాది దేశాలతో కొంతమంది మిలట్రీ అధికారులకు అనుమానాస్పదమైన సంబంధాలు ఉన్నట్టు తెలిపింది. కొంతమంది అధికారుల ప్రమేయంతో సైబర్ సెక్యూరిటీ ఉల్లంఘన జరిగినట్టు మిలట్రీ, ఇంటెలిజెన్స్ ఏజెన్సీలు గుర్తించాయని, ఇది వాట్సాప్ గ్రూప్లు వేదికగా జరిగినట్టు సంబంధిత అధికారులు వెల్లడించారు.
ఇంటెలిజెన్స్ ఇచ్చిన సమాచారంతో దీనిపై దర్యాప్తుకు ఆదేశించారు. దేశ భద్రత రీత్యా ఇప్పటికే పెట్టిన నిబంధనలను ఉల్లంఘించడాన్ని సహించబోమని, అలాంటి వాటి పట్ల కఠినంగా వ్యవహరిస్తామని అధికారులు తెలిపారు. ఈ విచారణలో దోషులుగా తేలిన అధికారులపై కఠిన చర్యలు తీసుకుంటామని సంబంధిత అధికారులు తెలిపారు. దేశ భద్రతకు సంబంధించిన ఈ సున్నితమైన విషయంలో ఎటువంటి ఊహాగానాలను ప్రచారం చేయవద్దని అభ్యర్థించారు.
ఇటీవల కాలంలో పాకిస్థాన్, చైనాకు ఇంటెలిజెన్స్ వర్కర్స్ భారత దేశానికి చెందిన రహస్య సమాచారాన్ని తెలుసుకోవడానికి ప్రయత్నిస్తున్నట్టు తెలుస్తోంది. దీనికోసం సోషల్ మీడియాను ఆయుధంగా మలుచుకున్నట్టు అధికారులు అనుమానిస్తున్నారు. సోషల్ మీడియాలో యాక్టివ్గా ఉన్న సైనికుల నుంచి వివరాలను సేకరించేందుకు ప్రయత్నిస్తున్నట్టు, ఆ ప్రయత్నాలు చాలా వరకు విఫలమయ్యాయని అధికారులు అంటున్నారు. అయితే వారి ఉచ్చులో చిక్కుకున్న కొంతమంది నుంచి వారికి కావాల్సిన వివరాలను తెలుసుకున్నట్టు తెలుస్తోంది.
|
|