ఆ ఘటనపై సీఎం జగన్ ఆగ్రహం.. ఇద్దరిపై వేటు
Andhra Pradesh Telugu | Suryaa Desk | Published : Thu, Apr 21, 2022, 01:36 PM
ఒంగోలులో సీఎం కాన్వాయ్ కోసం ప్రయాణికుల నుంచి కారు స్వాధీనం చేసుకున్న ఘటనపై ఏపీ సీఎం జగన్ ఆగ్రహం వ్యక్తం చేశారు. దీంతో ఉన్నతాధికారులు దీనికి కారణమైన హోంగార్డు పి.తిరుపతి రెడ్డి, అసిస్టెంట్ మోటార్ వెహికల్ ఇన్స్పెక్టర్ ఎ.సంధ్యను సస్పెండ్ చేశారు.
పల్నాడు జిల్లా వినుకొండకు చెందిన వేముల శ్రీనివాస్ తన కుటుంబంతో కలిసి తిరుమలకు బయలుదేరారు. మార్గమధ్యంలో ఆకలిగా ఉండటంతో బుధవారం రాత్రి ఒంగోలులోని స్థానిక పాత మార్కెట్ సెంటరులో కారును ఆపారు. టిఫిన్ చేస్తుండగా ఓ కానిస్టేబుల్ అక్కడికి వచ్చి ఈ నెల 22న సీఎం ఒంగోలు పర్యటన నేపథ్యంలో కాన్వాయ్ కోసం వాహనంతో పాటు డ్రైవర్ను ఇవ్వాలని డిమాండ్ చేశారు. తాము కుటుంబంతో తిరుమల వెళ్తున్నామని చెప్పినా వినిపించుకోలేదు. కారుతో పాటు డ్రైవర్ను తీసుకుని ఆ కానిస్టేబుల్ వెళ్లిపోయాడు. ఈ విషయం సంచలనంగా మారడంతో ఉన్నతాధికారులు చర్యలు తీసుకున్నారు.
|
|