అరగంటలో నాటో దేశాలను ధ్వంసం చేయగలం: రష్యా
international | Suryaa Desk | Published : Mon, May 09, 2022, 11:49 AM
ఉక్రెయిన్తో సాగుతున్న పోరుపై రష్యా సంచలన వ్యాఖ్యలు చేసింది. తాము తలచుకుంటే నాటో దేశాలను అర గంటలో నాశనం చేయగలమని రష్యా అంతరిక్ష సంస్థ రోస్కోస్మోస్ చీఫ్ దిమిత్రి రోగోజిన్ అన్నారు. దీంతో ఒక్కసారిగా ప్రపంచ దేశాల్లో కలవరం మొదలైంది. గతంలోనూ ఆయన ఇదే తరహా వ్యాఖ్యలు చేశారు. ఇంటర్నేషనల్ స్పేష్ స్టేషన్ను కూల్చేస్తామంటూ వ్యాఖ్యానించారు. ఇక రష్యన్లు మే 9న 'విక్టరీ డే'గా నిర్వహిస్తుంటారు. రెండవ ప్రపంచ యుద్ధంలో జర్మన్ నాజీ సైన్యాలపై సాధించిన విజయాలకు గుర్తుగా వీటిని నిర్వహిస్తారు. దీంతో ఈ రోజు రష్యా నుంచి యుద్ధంపై కీలక ప్రకటన వెలువడొచ్చని అంతా అభిప్రాయపడుతున్నారు. ఈ తరుణంలో దిమిత్రి రోగోజిన్ చేసిన వ్యాఖ్యలు ప్రాధాన్యత సంతరించుకున్నాయి. ఆయన వ్యాఖ్యలు అమెరికా, పశ్చిమ దేశాలను ఉద్దేశించి చేసిన హెచ్చరికలుగా తెలుస్తోంది.
రష్యా అధ్యక్షుడు పుతిన్కు రోస్కోస్మోస్ చీఫ్ దిమిత్రి రోగోజిన్ అత్యంత సన్నిహితుడు. ఈ క్రమంలో పదే పదే అణుయుద్ధంపై ఆయన చేసే వ్యాఖ్యలు గందరగోళానికి దారి తీస్తున్నాయి. ఓ వైపు అణుబాంబులు వేయమంటూనే రష్యా కాలు దువ్వుతోంది. తాజాగా సోమవారం రష్యా మీడియాతో మాట్లాడిన పుతిన్, పశ్చిమ దేశాలను ఓడించడమే తన లక్ష్యమంటూ వ్యాఖ్యానించారు. అణ్వాయుధాలు వాడబోయేది లేదని, అయితే పశ్చిమ దేశాలతో తమతో కయ్యానికి కాలు దువ్వుతున్నాయని అన్నారు.
|
|