మహారాష్ట్రంలో తీవ్ర విషాధం...మంటల్లో తొమ్మిది మంది సజీవ దహనం

మహారాష్ట్రలో తీవ్ర విషాదం ఘటన నెలకొంది. ఓ ఘటనలో ఏకంగా తొమ్మిది మంది సజీవ దహనమయ్యారు. డీజిల్ ట్యాంకర్-ట్రక్కు ఢీకొని తొమ్మిది మంది సజీవదహనమయ్యారు. ఈ ఘోర ప్రమాదం మహారాష్ట్రలోని చంద్రాపుర్‌లో శుక్రవారం ఉదయం చోటుచేసుకుంది. చంద్రపూర్-మౌల్ రహదారిపై అజయ్‌పూర్ సమీపంలో ఉదయం 10.30 గంటలప్పుడు కలపతో వస్తున్న ట్రక్కును ఎదురుగా వస్తున్న డీజిల్ ట్యాంకర్ ఢీకొట్టింది. దీంతో భారీగా మంటలు చెలరేగి వాహనాలకు అంటుకున్నాయి. అక్కడికక్కడే 9 మంది మంటల్లో చిక్కుకుని కాలిబూడిదయ్యారు. ప్రమాదం తర్వాత భారీగా మంటలు ఎగిసిపడ్డాయి. దీంతో స్థానికులు తీవ్ర భయాందోళనకు గురయ్యారు.

ఈ ఘటన గురించి సమాచారం అందుకున్న పోలీసులు.. అక్కడకు చేరుకుని సహాయక చర్యలు చేపట్టారు. అగ్నిమాపక సిబ్బంది ఫైర్ ఇంజిన్‌ సాయంతో తీవ్రంగా శ్రమించిన మంటలను అర్పివేశారు. కొద్ది గంటల తర్వాత మంటలు అదుపులోకి వచ్చాయి. ప్రమాదం అడవి సమీపంలో జరగడంతో గంట తర్వాత ఫైర్ సిబ్బంది అక్కడకు చేరుకున్నట్టు అటవీ శాఖ వర్గాలు తెలిపాయి.

ప్రమాద ఘటనపై కేసు నమోదుచేసిన పోలీసులు.. దర్యాప్తు చేపట్టారు. మృతదేహాలను స్వాధీనం చేసుకుని పోస్ట్‌మార్టం కోసం చంద్రాపూర్ ఆస్పత్రికి తరలించారు. నిర్లక్ష్యంగా వాహనం నడిపడం వల్లే ప్రమాదం సంభవించినట్టు ప్రాథమికంగా నిర్ధారించారు. క్షతగాత్రులను గుర్తించే ప్రక్రియ కొనసాగుతోందని పోలీసులు పేర్కొన్నారు. పూర్తిగా కాలిబూడిదై గుర్తు పట్టలేనంతగా మృతదేహాలు ఉన్నాయని, గుర్తింపు ప్రక్రియ కష్టంగా మారిందని చెప్పారు. చనిపోయింది ఎవరు అనేది తెలియాల్సి ఉందన్నారు.

మరోవైపు, ఈ ప్రమాదంపై మహారాష్ట్ర ముఖ్యమంత్రి ఉద్ధవ్ ఠాక్రే తీవ్ర దిగ్భ్రాంత్రి వ్యక్తం చేశారు. బాధితుల కుటుంబాలకు తన ప్రగాఢ సానుభూతి తెలిపిన ఉద్ధవ్.. వారికి అన్ని విధాలుగా ఆదుకుంటామని హామీ ఇచ్చారు. మృతుల కుటుంబాలకు ఆర్థిక సాయం అందజేస్తామని తెలిపారు.