త్వరలో భారత విమానాశ్రయాల్లోకి ఆకాశ ఎయిర్ ఫ్లైట్ లు..టైర్ 2, టైర్ 3 నగరాలకే తొలి ప్రధాన్యం

త్వరలోనే భారత విమానాశ్రయాల్లోకి ఆకాశ ఎయిర్ ఫ్లైట్ లు దర్శనమివ్వనున్నాయి. అత్యాధునిక, బ్రాండ్ న్యూ 737 మ్యాక్స్ ఎయిర్‌క్రాఫ్ట్‌తో ఇది మార్కెట్లోకి వస్తోంది. అత్యంత ఇంధన సమర్థవంతమైన సీఎఫ్ఎం లీప్ బీ ఇంజిన్‌ను ఇది ఆఫర్ చేస్తోంది. దేశంలోనే అత్యంత చిన్న, పర్యావరణహితమైన ఎయిర్‌క్రాఫ్ట్ ఇది. ఆకాశ ఎయిర్‌కి విమానాలు సిద్ధం చేసేందుకు అమెరికా ఎయిర్‌క్రాఫ్ట్ తయారీ దిగ్గజం బోయింగ్‌తో ఆకాశ ఎయిర్ ఒప్పందం కుదుర్చుకుంది. ప్రముఖ ఇన్వెస్టర్ రాకేశ్ ఝున్‌ఝున్‌వాలాకు చెందిన ఆకాశ ఎయిర్ ‘ఫస్ట్ లుక్’ను కంపెనీ విడుదల చేసింది. పోర్ట్‌ల్యాండ్‌లోని తన బోయింగ్ ఉత్పత్తి ప్లాంట్‌లో ఉన్న ఈ ఎయిర్‌క్రాఫ్ట్ విమానం డెలివరీకి సిద్ధమైనట్టు కంపెనీ తెలిపింది. జూన్ మధ్యలో తమ తొలి ఎయిర్‌క్రాఫ్ట్‌ను పొందుతామని, జూలై 2022 నుంచి భారత్‌లో వాణిజ్య కార్యకలాపాలు ప్రారంభిస్తామని ఆకాశ ఎయిర్ ప్రకటించింది. దేశవ్యాప్తంగా పలు మార్గాలలో మార్చి 2023 నాటికి 18 విమానాలను నడుపుతామని కంపెనీ తెలిపింది. ఎక్కువగా టైర్ 2, టైర్ 3 నగరాలపై తమ దృష్టి ఉన్నట్టు చెప్పింది.

ఆకాశ ఎయిర్ తన తొలి విమాన ఫోటోను సోమవారం ట్విటర్‌లో షేరు చేసింది. ‘‘కాంట్ కీప్ కామ్! మా క్యూపీ-పై కి హాయ్ చెప్పండి!..’’ అంటూ ట్వీట్ చేసింది ఆకాశ ఎయిర్. అంతేకాక త్వరలోనే మీ ఆకాశంలోకి రాబోతున్నాం అంటూ తెలిపింది. కాగా, అత్యంత సరసమైన ధరలలో విమానయానాన్ని ప్రజలకు అందించేందుకు స్టాక్ మార్కెట్ బిగ్ బుల్ రాకేశ్ ఝున్‌ఝున్‌వాలా ఆకాశ ఎయిర్ పేరుతో ఈ సంస్థను మొదలు పెట్టారు. ప్రస్తుతం కంపెనీ విడుదల చేసిన ఫోటోలలో ఆరెంజ్, ఉదా రంగులో ఈ విమానం చూడగానే ఆకట్టుకునేలా ఉంది.

ఈ లో-కాస్ట్ క్యారియర్ ఈ వేసవిలోనే ఎగరాలని చూస్తోంది. భారత్‌లో పెరుగుతోన్న డిమాండ్‌ను అందుకునేందుకు తామ సరికొత్త 737 ఫ్లీట్‌ను ఉపయోగించనున్నట్టు కంపెనీ పేర్కొంది. కమర్షియల్ విమాన సేవలను ప్రారంభించుకునేందుకు గతేడాది అక్టోబర్‌లోనే సివిల్ ఏవియేషన్ మంత్రిత్వ శాఖ నుంచి నో అబ్జెక్షన్ సర్టిఫికేట్‌ను ఆకాశ ఎయిర్ పొందింది.