అసోం ఛానల్ ను హ్యాక్ చేసిన పాకిస్తాన్

మన పొరుగు శత్రుదేశమైన పాకిస్తాన్ ప్రతిసారి కవ్వింపు చర్యలకే కాదు మన దేశంలో పలుమార్లు కుట్రలు పన్నుతూనే ఉంది. ఈ క్రమంలోనే అసోం టైమ్ 8 డిజిటల్ న్యూస్ ఛానెల్ యూట్యూబ్ ఖాతా హ్యాక్ అయింది. పాకిస్థాన్ ఆధారిత హ్యాకింగ్ గ్రూప్ రెవల్యూషన్ పాకిస్తాన్ లైవ్ స్ట్రీమ్ సమయంలో ఛానల్‌ను హ్యాక్ చేసింది. పైగా లైవ్ ఫీడ్‌లో పాకిస్థాన్ జెండాను పెట్టారు. పవిత్ర ప్రవక్త హజ్రత్ మహ్మద్‌ని గౌరవించండి. అనే వ్యాక్యాలు వినిపించేలా జెండాను ప్రదర్శించారు. ఈ వార్త సోషల్ మీడియాలో రివల్యూషన్ పీకే అనే హ్యాష్‌ట్యాగ్‌తో ట్రెండ్ అవుతోంది.

ఈ అంశానికి సంబంధించిన ఆ ఛానల్ ఒక ప్రకటనను విడుదల చేసింది. "జూన్ 9న లైవ్ న్యూస్ స్ట్రీమ్ సమయంలో, టైమ్ 8  ప్రసారానికి భంగం కలిగింది. బ్రేకింగ్ న్యూస్ ప్రసారం అవుతుండగా స్క్రీన్‌పై పాకిస్థాన్ జెండా, ప్రవక్త మహ్మాద్ ప్రశంసిస్తూ ఒక శ్లోకం నడుస్తోంది. ఇది ఇటీవల ప్రవక్తపై జరిగిన దైవదూషణ సంఘటనను హైలైట్ చేస్తుంది.." అని టైమ్ 8 డిజిటల్ న్యూస్ నెట్‌వర్క్ వ్యవస్థాపకుడు, మేనేజింగ్ ఎడిటర్ ఉత్పల్ కాంత పేర్కొన్నారు.

అంతేకాదు ఇది సైబర్ టెర్రరిజం చర్య అని, తాము దీనిని బలంగా ఖండిస్తున్నామని ఉత్పల్ కాంత అన్నారు. భద్రతకు సంబంధించిన ఆందోళన వ్యక్తం చేస్తున్నామని అన్నారు. "హ్యాకర్లు తమ మతపరమైన అభిప్రాయాలను ఛానల్లో చట్టవిరుద్ధంగా వ్యక్తం చేయడమే కాకుండా ట్విట్టర్, ఫేస్‌బుక్‌‌లో హ్యాక్ చేసిన వీడియోలను కూడా లీక్ చేశారని, భారతదేశం పరువు తీసే ఉద్దేశంతో ఇది చేసినట్టు తాము అభిప్రాయపడుతున్నాం. పాకిస్థానీ ట్విట్టర్ వినియోగదారులు దానికి అనుకూలంగా ట్వీట్ చేయడం ద్వారా తమ ఆనందాన్ని వ్యక్తం చేశారు." అని ఉత్పల్ కాంత అన్నారు.

అలాగే దీనిపై నెట్‌వర్క్ అధికారులను అప్రమత్తం చేశామని, గౌహతి పోలీసులకు ఫిర్యాదు చేశామని ఛానెల్ ప్రతినిధులు తెలిపారు. ఈ ఫిర్యాదుపై విచారణ జరుగుతోంది. కాగా బీజేపీ మాజీ అధికార ప్రతినిధి నూపుర్ శర్మ, మరొక నేత నవీన్ కుమార్ జిందాల్ గత నెలలో ప్రవక్త గురించి చేసిన వ్యాఖ్యలు వివాదాస్పదం అయ్యాయి. దానిపై అనేక ముస్లిం దేశాలు కూడా ఆగ్రహం వ్యక్తం చేశాయి. ఈ క్రమంలో ఛానల్‌ను హ్యాక్ చేసి పాకిస్థాన్ జెండాను ప్రదర్శించడం ప్రాధాన్యతను సంతరించుకుంది.