ఉగ్రవాదులను పట్టించినందుకు ఆ గ్రామానికి నగదు నజరానా

ఏదైనా మంచి పనిచేస్తే లేదా సాహసం చేస్తేనో  ఓ వ్యక్తికి నజరానా ఇవ్వడం సర్వసాధరణం. కానీ  ఏకంగా గ్రామం మొత్తానికి నజరానా ఇచ్చిన సందర్భాలు చాలా అరుదు అని చెప్పవచ్చు. జమ్మూ కశ్మీర్ లోని ఓగ్రామం నగదు నజరానా అందుకొంది. జమ్మూకశ్మీర్‌లో రియాసి సమీపంలోని తుక్సాన్ గ్రామంలో ఆదివారం ఉదయం ఇద్దరు లష్కరే తోయిబా ఉగ్రవాదులను పట్టుకుని పోలీసులకు అప్పగించారు. ఇద్దరి దగ్గర భారీ ఆయుధాలు ఉన్నాయి. వారిద్దరూ పుల్వామాకు చెందిన బషీర్ అహ్మద్ దార్ కుమారుడు ఫైజల్ అహ్మద్ దార్, రాజౌరికి చెందిన హైదర్ షా కుమారుడు తాలిబ్ హుస్సేన్‌గా పోలీసులు గుర్తించారు. వారి దగ్గర నుంచి రెండు ఏకే-47 రైఫిళ్లు, ఏడు గ్రెనేడ్లు, ఒక పిస్టల్, భారీ మందుగుండు సామగ్రిని స్వాధీనం చేసుకున్నట్టు పోలీసులు తెలిపారు.

గత రెండు మూడేళ్లుగా రాజౌరనీ-పూంచ్ జిల్లాలో జరిగిన అన్ని ఉగ్రవాద కార్యకలాపాలకు హుస్సేన్ ప్రధాన సూత్రధారి అని పోలీసులు తెలిపారు. రాజౌరిలోని కొట్రాంక ప్రాంతంలో జరిగిన అనేక పేలుళ్లకు కారణమైన బృందానికి ఆయన నాయకత్వం వహిస్తున్నారని వారు చెప్పారు. "హుస్సేన్‌ పాకిస్థాన్‌లో ఉన్న ఎల్‌ఈటీ ఉగ్రవాది ఖాసిమ్‌తో నిరంతరం టచ్‌లో ఉన్నాడు. రాజౌరి జిల్లాలో కనీసం మూడు పేలుడు కేసులు, పలు హత్యలు, గ్రెనేడ్ పేలుళ్లలో పాల్గొన్నాడు." అని పోలీసులు తెలిపారు.

ఈ ఏడాది ప్రారంభంలో రాజౌరి జిల్లాలో జరిగిన మూడు పేలుళ్లతో సహా పిర్ పంజాల్ లోయలో పెరుగుతున్న ఉగ్రవాద సంఘటనల వెనుక ఉన్న హుస్సేన్‌ను వాంటెడ్ మిలిటెంట్‌గా పోలీసులు ఇటీవల ప్రకటించారు. అతడిపై రివార్డు కూడా ఉంది. ప్రాథమిక విచారణలో ఇద్దరు ఉగ్రవాదులు కూడా పాకిస్తానీ లష్కరేటర్ హ్యాండ్లర్ సల్మాన్‌తో టచ్‌లో ఉన్నట్టు పోలీసులకు తెలిసింది.

మరోవైపు గ్రామస్థుల ధైర్యసాహాసాలను మెచ్చిన కశ్మీర్ డైరెక్టర్ జనరల్ ఆఫ్ పోలీస్ (డీజీపీ) దిల్బాగ్ సింగ్ రూ.2 లక్షలను నజరానాగా ప్రకటించారు. మరోవైపు ఇద్దరు ముష్కరులను పట్టుకున్న తుక్సన్ గ్రామస్థులకు జమ్ముకశ్మీర్ లెఫ్టినెంట్ గవర్నర్ మనోజ్ సిన్హా రూ.5 లక్షలు ఇస్తామని చెప్పారు. "ఇద్దరు మోస్ట్ వాంటెడ్ టెర్రరిస్టులను పట్టుకున్న టక్సన్ ధోక్, రియాసీ గ్రామస్థుల ధైర్యానికి నేను వందనం చేస్తున్నాను. సామాన్యుల ఇలాంటి దృఢ సంకల్పం ఉగ్రవాదం అంతం ఎంతో దూరంలో లేదని తెలియజేస్తోంది." అని ఆయన చెప్పారు.