నపుర్ శర్మ కసం...లుక్‌ అవుట్ నోటీసులు జారీ

నుపుర్ శర్మపై స్థానిక నివాసి ఫిర్యాదు చేయడంతో జూన్ 13న కోల్‌కతాలోని నార్కెల్‌దంగా పోలీస్ స్టేషన్‌లో ఆమెపై ఎఫ్‌ఐఆర్ నమోదైంది. ఈ మేరకు జూన్ 20న పోలీసుల ముందు హాజరుకావాలని శర్మను కోరారు. పోలీసుల ముందు హాజరు కావడానికి ఆమె మరింత సమయం కోరారు. పేర్కొన్న తేదీలో విచారణకు హాజరు కాలేనంటూ ఈ మెయిల్ పంపించారు. అలాగే జూన్ 23న కోల్‌కతాలోని అమ్హెర్స్ట్ స్ట్రీట్ పోలీస్ స్టేషన్ నుంచి శర్మకు రెండో నోటీసు పంపించారు. అందులో జూన్ 25న హాజరు కావాలని కోరారు.

ఇదిలావుంటే నుపుర్ శర్మ‌‌పై కోల్‌కతా పోలీసులు శనివారం లుక్‌ అవుట్ నోటీసులు జారీ చేశారు. ఆమెను అమ్‌హెరెస్ట్‌, నార్కెల్‌దంగా పోలీస్ స్టేషన్ల ఎదుట హాజరుకావాలని కోరారు. అయితే ఇప్పటి వరకు ఆమె హాజరు కాలేదు. పైగా మరింత సమయం కోరారు. ఈ నోటీసులు జారీ చేసిన తేదీ నుంచి ఏడాది వరకు చెల్లుబాటు అవుతుంది. మహమ్మద్ ప్రవక్తపై నుపుర్ శర్మ చేసిన వివాదాస్పద వ్యాఖ్యలపై సుప్రీంకోర్టు ఆగ్రహం వ్యక్తం చేసిన ఒక రోజు తర్వాత ఈ పరిణామం చోటుచేసుకుంది.

నుపుర్ శర్మ వివాదాస్పద వ్యాఖ్యల కారణంగా జూన్ రెండో వారంలో పశ్చిమ బెంగాల్‌లోని హౌరా, ముర్షిదాబాద్, నదియా జిల్లాలో హింస చెలరేగింది. ఆమె మాటల కారణంగా అనేక దుష్ఫరిణామాలు చోటుచేసుకున్నాయి. దాంతో ఆమెపై విమర్శలు వెల్లువెత్తాయి. అనేక చోట్ల ఆమెపై ఫిర్యాదులు చేశారు. బీజేపీ నుంచి ఆమెను సస్పెండ్ చేశారు. ఈ నేపథ్యంలో తన ప్రాణాలకు ముప్పు ఉందని, వివిధ రాష్ట్రాల్లో నమోదైన ఎఫ్‌ఐఆర్‌లను ఢిల్లీకి బదిలీ చేయాలని నుపుర్ శర్మ సుప్రీంకోర్టును ఆశ్రయించారు. ఆమె అభ్యర్థనను కోర్టు తోసిపుచ్చింది. పిటిషన్‌ను వెనక్కి తీసుకోవాలని ఆదేశించింది. నుపుర్ వర్మ చేసిన అనుచిత వ్యాఖ్యలపై సుప్రీంకోర్టు ఆగ్రహం వ్యక్తం చేసింది. ఆమె మాటల వల్లే దేశ భద్రత ప్రమాదంలో పడిందని కోర్టు పేర్కొంది. ఆమె అన్న మాటలకు దేశ ప్రజలకు క్షమాపణలు చెప్పాలని సూచించింది.