మండుతున్న లండన్...ఎండ తాకిడికి ఏకంగా రైలు పట్టాలే కాలిపోతన్నాయ్

తీవ్ర ఎండల కారణంగా లండన్ మండుతోంది. కాలుతున్న రైలుపట్టాలే  అక్కడి పరిస్థితి తీవ్రతను తెలియజేస్తోంది. మండుతున్న ఎండల్లో కొంతమంది చపాతీలు కాల్చారు.. కొందరు దోసెలు కూడా వేశారు. మరికొందరు ఆమ్లెట్లు వేసిన సందర్భాలు ఉన్నాయి. స్టవ్‌తో పని లేకుండా కేవలం ఎండతో ఇలాంటి వంటలు చేసిన చాలా ఘటనలు చూశాం. మన దేశంలో ఎండాకాలం దాదాపుగా అన్ని రాష్ట్రాల్లో ఇలాంటి పరిస్థితి ఉంటుంది. కానీ ఒక దగ్గర ఎండలు కారణంగా రైలు పట్టాలపై మంటలు చెలరేగాయి. ఆశ్చర్యంగా ఉందా...? నమ్మశక్యంగా లేదా..? కానీ ఇది పచ్చి నిజం. ఈ అరుదైన ఘటన లండన్‌లో చోటుచేసుకుంది.

వాండ్స్‌వార్త్ రోడ్, లండన్ విక్టోరియాలో ఉన్న ఒక వంతెనపై ఉన్న రైలు పట్టాలపై అకస్మాత్తుగా మంటలు చెలరేగాయి. ఈ విషయాన్ని సౌత్‌ఈస్ట్రన్‌ రైల్వే ఎండీ స్టీవ్‌ వైట్ ట్విట్టర్ ద్వారా వెల్లడించారు. దానికి సంబంధించిన ఫోటోను కూడా షేర్ చేశారు. అయితే సకాలంలో అగ్నిమాపక సిబ్బంది స్పందించి మంటలను అదుపు చేశారని ఆయన పేర్కొన్నారు. లండన్ అగ్నిమాపక దళానికి ఆయన తన కృతజ్ఞతలు కూడా తెలియజేశారు. అలాగే ఈ విషయాన్ని సౌత్ఈస్ట్ నెట్‌వర్క్ రైల్ కూడా తెలియజేసింది. ట్విట్టర్‌లో సంబంధిత చిత్రాలను పోస్ట్ చేసింది. ఎండకి వంతెనపై ఉన్న చక్రాల కలప బాగా ఎండిపోవడంతో మంటలు అంటున్నాయని తెలియజేసింది. ఈ నేపథ్యంలో ట్రాక్‌లను మార్చాల్సిన అవసరం ఉందా..? లేదా..? అనేది పరిశీలిస్తున్నట్టు సంస్థ పేర్కొంది.

ఇదిలావుంటే లండన్‌లో అధిక ఉష్ణోగ్రతల నమోదవుతున్నాయి. అక్కడి ప్రజలు ఎండలకు ఇబ్బందులు ఎదుర్కొంటున్నారు. అక్కడి ఉష్ణోగ్రతలు 34 డిగ్రీల సెల్సియస్‌కు పెరిగే అవకాశం ఉంది. ఈ వేడి వల్ల ఎదురయ్యే ఆరోగ్య, రవాణా సమస్యల గురించి అక్కడి వాతావరణ శాఖ ప్రజలకు హెచ్చరికలు జారీ చేసింది. దక్షిణం, మిడ్‌లాండ్స్, ఇంగ్లండ్ తూర్పు భాగమంతటా మూడో స్థాయి హీట్ హెల్త్ అలర్ట్‌లు అమల్లో ఉన్నాయి. వేడిని తట్టుకోవడానికి వీలున్న చోట ప్రజలు ఇళ్లలోనే ఉండాలని, వాటర్‌ ఎక్కువగా తీసుకోవాలని అధికారులు సూచించారు. వచ్చే వారం వరకు ఇదే పరిస్థితి కొనసాగే అవకాశం ఉందని అధికారులు చెబుతున్నారు.