ఆ రహదారిపై సొంత పార్టీ ఎంపీ కూడా విమర్శ

బీజేపీ ప్రభుత్వ నిర్మాణాలపై అదే పార్టీకి చెందిన సొంత ఎంపీయే విమర్శలు గుప్పిస్తే అది పెద్ద  వార్తే. ఇదిలావుంటే ప్రధాని అట్టహాసంగా ప్రారంభించిన కొన్ని రోజులకే హైవే రహదారిపై గుంతలు పడ్డాయి. దీనికి సంబంధించిన వీడియోలు, ఫోటోలు సోషల్ మీడియాలో వైరల్ అయ్యాయి. 296 కిలో మీటర్ల బుందేల్‌ఖండ్ ఎక్స్‌ప్రెస్‌ వేను ప్రధాని నరేంద్ర మోదీ జూలై 16న ప్రారంభించారు. అయితే కొన్ని రోజులుగా కురుస్తోన్న వర్షానికి ఆ రహదారిపై భారీ గుంతలుపడ్డాయి. దీనిపై విమర్శలు వెల్లువెత్తున్నాయి. భారీ వర్షాల కారణంగా మట్టి కోతకు గురైందని, గుంతలను తక్షణమే పూడ్చి రహదారిపై ట్రాఫిక్‌కు క్లియర్ చేశామని యూపీ ఎక్స్‌ప్రెస్‌వే ఇండస్ట్రియల్ అథారిటీ ప్రతినిధి దుర్గేష్ ఉపాధ్యాయ చెప్పారు. అయితే ఈ పరిణామంపై ప్రతిపక్షాల విమర్శలు గుప్పించాయి. దీనిపై సమాజ్‌వాదీ పార్టీ అధినేత అఖిలేష్ యాదవ్ స్పందించారు. బీజేపీ అభివృద్ధి నాణ్యతకు ఇదో ఉదాహరణ అని ఆయన అన్నారు. "బీజేపీ సగం పూర్తైన అభివృద్ధి నాణ్యతకు ఇది ఒక నమూనా. బుందేల్‌ఖండ్ ఎక్స్‌ప్రెస్ వేని పెద్ద వ్యక్తులు ప్రారంభించారు. కానీ వారంలోనే దానిపై భారీ అవినీతి గొయ్యి బయటపడింది. దానిపై రన్‌వే నిర్మించకపోవడం మంచిది. " అని అఖిలేష్ యాదవ్ హిందీలో ట్వీట్ చేశారు.

అలాగే కొద్దిరోజుకే రోడ్డు నిర్మాణంలో డబుల్ ఇంజన్ బీజేపీ ప్రభుత్వం అవినీతిని రుజువు చేసిందని, సగం పూర్తైన బుందేల్‌ఖండ్ ఎక్స్‌ప్రెస్‌వేను ప్రారంభించడం ద్వారా ప్రజల ప్రాణాలను ప్రమాదంలో పడేసిందని సీఎం క్షమాపణ చెప్పాలని సమాజ్‌వాదీ పార్టీ కూడా పేర్కొంది. గుంతలు లేని రహదారులు ఇస్తామని ప్రభుత్వం వాగ్ధానం చేసిందని, బుందేల్‌ఖండ్ ఎక్స్‌ప్రెస్‌వే ప్రారంభోత్సవం జరిగిన నాలుగు రోజుల తర్వాత అభివృద్ధి దెబ్బతిన్నదని ఉత్తరప్రదేశ్ కాంగ్రెస్ కూడా విమర్శించింది.

అంతేకాదు సొంత పార్టీ ఎంపీ కూడా ఎక్స్‌ప్రెస్ వే నాణ్యతను ప్రశ్నించారు. రూ.15,000 కోట్లతో నిర్మించిన ఎక్స్‌ప్రెస్‌వే ఐదు రోజుల వర్షాలకు కూడా తట్టుకోలేకపోతే, దాని నాణ్యతపై తీవ్రమైన ప్రశ్నలు తలెత్తుతున్నాయని బీజేపీ ఎంపీ వరుణ్ గాంధీ ఆరోపణలు చేశారు. అలాగే ఈ వ్యవహారంలో ప్రాజెక్ట్ హెడ్, సంబంధిత ఇంజనీర్, బాధ్యులైన కంపెనీలను పిలిపించి వారిపై చర్యలు తీసుకోవాలని అన్నారు. కాగా చిత్రకూట్, బందా, మహోబా, హమీర్‌పూర్, జలౌన్, ఔరయ్యా, ఇటావా అనే ఏడు జిల్లాల గుండా వెళ్తున్న బుందేల్‌ఖండ్ ఎక్స్‌ప్రెస్‌వేని శనివారం ప్రధాని మోదీ ప్రారంభించారు.