ఎమ్మెల్యే అయినా...తన మూలాలు మరవలేదు
Andhra Pradesh Telugu | Suryaa Desk | Published : Sat, Jul 23, 2022, 02:29 PM
ఆ ఎమ్మెల్యే మళ్లీ పొలంలో దిగారు వరి నాట్లు వేశారు. ఆయన ఎవరో కాదు మంగళగిరి ఎమ్మెల్యే ఆళ్ల రామకృష్ణారెడ్డి. గతంలోనూ తన పొలంలో దిగి ఆయన వ్యవసాయం చేశారు. ఆయన సామాన్య రైతు కుటుంబం నుంచి వచ్చి.. ఎలాంటి రాజకీయ నేపథ్యం లేకపోయినా రెండుసార్లు ఎమ్మెల్యేగా గెలిచారు. ప్రజా ప్రతినిధిగా హోదా పెరిగినా, తనకు తీరిక లేకపోయినా సరే.. తన మూలాలను మర్చిపోలేదు. ఇప్పటికీ ఓ సాధారణ రైతు బిడ్డగా వ్యవసాయం చేస్తున్నారు. ప్రజా ప్రతినిధిగా తన నియోజకవర్గ బాధ్యతల్ని చూసుకుంటూనే.. తన పొలంలో వ్యవసాయానికి కొంత సమయం కేటాయిస్తున్నారు.
గురువారం ఫిరంగిపురం మండలం వేమవరం గ్రామంలోని తన పొలంలో వ్యవసాయం చేశారు. కూలీలతో కలిసి కలుపు ఏరి పొలంలో నాట్లు వేయడానికి మెరకపల్లాలను చదును చేయడానికి నిచ్చెన లాగారు. ఆ తర్వాత నారుమడికి విత్తనాలు చల్లి, కంది నాటారు. వ్యవసాయ కూలీలతో కలిసి పొలంలోనే వారితోపాటు భోజనం చేసి వ్యవసాయ పనుల్లో బిజీ అయ్యారు. ఎమ్మెల్యే ఆర్కే నియోజకవర్గంలోని అభివృద్ధి పనులను చూసుకుంటూనే వ్యవసాయం చేస్తున్నారు. ఈ ఫోటోలు సోషల్ మీడియాలో వైరల్ అవుతున్నాయి.
అంతేకాదు పొలాలను దున్నేందుకు ట్రాక్టర్లు అందుబాటులోకి వచ్చినా సరే.. రామకృష్ణారెడ్డి మాత్రం ఇప్పటికీ ఎద్దులతో దుక్కి దున్నుతున్నారు. కూరగాయలతో పాటూ సీజన్ను బట్టి పంటల్ని సాగు చేయడం అలవాటు. ఎడ్లబండి సాయంతో తన పొలానికి వెళుతూ.. వ్యవసాయానికి కావాల్సిన అన్నింటిని సమకూర్చుకుంటారు. తనకు ఉన్న పొలంలో పంటల్ని సాగు చేసుకుంటూ ఓ సాధారణ రైతులా గడుపుతారు ఆళ్ల.
|
|