కేశినేని నాని ఆత్మీయ విందు...హాజరైన వైసీపీ ఎంపీ

టీడీపీ ఎంపీ కేశినేని నాని పలువురు ఎంపీలకు ఆత్మీయ విందు ఏర్పాటు చేశారు. దీంతో ఆ విందుకు వైసీపీ ఎంపీ హాజరుకావడంతో రాజకీయంగా ప్రధాన్యత సంతరించుకొంది. అంతేకాదు టీడీపీ ఎంపీలతో కలిసి వైసీపీ ఎంపీ కలసి దిగిన ఓ ఫోటో సోషల్ మీడియాలో మంగళవారం నుంచి వైరల్ అవుతోంది. అసలే టీడీపీ వర్సెస్ వైసీపీ అన్న రేంజ్‌లో పొలిటికల్ హీట్ కొనసాగుతుంటే.. అధికార పార్టీ ఎంపీ టీడీపీ ఎంపీలతో ప్రత్యక్షం కావడం ఆసక్తి రేపింది. వైఎస్సార్‌సీపీ యువ నేత‌, న‌ర‌స‌రావుపేట ఎంపీ లావు శ్రీకృష్ణ‌దేవ‌రాయ‌లు మంగ‌ళ‌వారం టీడీపీ ఎంపీల‌తో క‌లిసి క‌నిపించారు. టీడీపీతో పాటు మ‌రికొన్ని పార్టీల ఎంపీల‌లు కూడా వారితో పాటూ ఉన్నారు.

నర్సరావుపేట ఎంపీ లావు శ్రీకృష్ణ‌దేవ‌రాయ‌లు విజ‌య‌వాడ ఎంపీ కేశినేని నాని ఢిల్లీలో నివాసానికి వెళ్లారు. అక్క‌డ టీడీపీకి చెందిన ముగ్గురు ఎంపీలు కేశినేని, గ‌ల్లా జ‌య‌దేవ్‌, కింజ‌రాపు రామ్మోహన్ నాయుడులతో కలిసి గ్రూప్ ఫొటో దిగారు. ఈ ఫొటోలో టీడీపీ ముగ్గురు ఎంపీలు, వైసీపీ ఎంపీ లావుల‌తో పాటు డీఎంకేకు చెందిన ఎంపీలు క‌నిమొళి, త‌మిజాచ్చి తంగ‌పాండియ‌న్‌, క‌థిర్ ఆనంద్‌, ఎన్సీపీ ఎంపీ సుప్రియా సూలేతో పాటూ శివ‌సేన ఎంపీ ధైర్య‌శీల్ మానే ఉన్నారు. వీరంతా క‌లిసి కేశినేని నాని ఇంటికి వెళ్లారు. డీఎంకే ఎంపీ కథిర్ ఆనంద్ ఫొటోను సోష‌ల్ మీడియాలో పోస్ట్ చేశారు.

సోషల్ మీడియాలో ఈ ఫోటో చక్కర్లు కొడుతోంది. వైఎస్సార్‌సీపీ ఎంపీ టీడీపీ ఎంపీలతో పాటూ సహచర ఎంపీలతో కనిపించడంతో హాట్ టాపిక్ అయ్యింది. అయితే కేశినేని నాని నివాస గృహంలో సహచర ఎంపీలకు ఇచ్చిన 'ఆత్మీయ విందు'కు వీరంతా హాజరయ్యారట. దీని వెనుక ఎలాంటి రాజకీయ కారణాలు లేవు. దీంతో ఊహాగానాలకు చెక్ పడింది.