ఆ అస్థిపంజరం..ఏకంగా రూ. 48.5 కోట్ల ధర పలికింది

పురాతన వస్తువులకు  ఇటీవల భారీ డిమాండ్ లభిస్తోంది. పురాతన  వస్తువు ఏది అమ్మిన కోట్ల రూపాయల ఆదాయం వస్తోంది.  కానీ ఓ అస్థిపంజరం కూడా కోట్ల రూపాయల ఆదాయం తెస్తుందన్నది ఎవరైనా ఊహిస్తారా...? అదో అస్థి పంజరం.. అదీ కోట్ల ఏళ్ల కిందటిది. కానీ ఏకంగా రూ. 48.5 కోట్ల ధర పలికింది. మరి అది సాదా సీదా అస్థి పంజరం కాదు.. డైనోసార్లలో భయంకరమైన టైరనోసారస్ రెక్స్ (టీ రెక్స్) కంటే ముందునాటి గోర్గోసారస్ డైనోసార్ అస్థి పంజరం. అంతేకాదు.. ఇది టి రెక్స్ కంటే కూడా వేగంగా కదులుతూ దాడి చేయగలదని, దీని బలం కూడా ఎక్కువని నిపుణులు చెబుతున్నారు.

తొలితరం డైనోసార్లు తిరుగాడిన క్రేటాషియస్ కాలానికి చెందిన భయానక మాంసాహార డైనోసార్లలో గొర్గోసారస్ ఒకటని.. అమెరికా, కెనడా ప్రాంతాల్లో జీవించిందని శాస్త్రవేత్తలు చెబుతున్నారు. ఈ గొర్గోసారస్ అస్థి పంజరాన్ని 2018లో అమెరికాలోని మోంటానాలో జుడిత్ నది సమీపంలో గుర్తించారు. పది అడుగుల ఎత్తు, 22 అడుగుల పొడవు ఉన్న ఈ అస్థి పంజరం 7.7 కోట్ల ఏళ్ల కింద తిరుగాడిన డైనోసార్ దిగా నిర్ధారించారు.

ప్రఖ్యాత సోత్ బీ వేలం శాల జులై 21 నుంచి న్యూయార్క్ లో దీనిని ప్రదర్శనకు ఉంచింది. తాజాగా వేలం వేయగా.. 6.1 మిలియన్ డాలర్లు (మన కరెన్సీలో సుమారు రూ.48.5 కోట్లు) పలికింది.

గొర్గోసారస్ డైనోసార్లు రెండు టన్నుల వరకు బరువు తూగేవని.. టీ రెక్స్ కన్నా వేగంగా, బలంగా దాడి చేసేవని శాస్త్రవేత్తలు చెబుతున్నారు. గార్గోసారస్ లు ఏకంగా 42 వేల న్యూటన్ల బలంతో కొరికేసేవి అని అంచనా వేశారు. మనకు తెలిసిన అత్యంత బలమైన సింహాలు, పులులు కొరికే బలం నాలుగైదు వేల న్యూటన్లు మాత్రమే కావడం గమనార్హం. అంటే సింహం కంటే పదింతలు బలంతో దాడి చేసేదన్న మాట. ఇంతకుముందు 1997లో టీ–రెక్స్ డైనోసార్ అస్థి పంజరాన్ని వేలం వేయగా 8.36 మిలియన్ డాలర్లకు (రూ.66.36 కోట్లు) అమ్ముడు పోయింది.  2020లో మరో టీ–రెక్స్ అస్థి పంజరానికి ఏకంగా 31.8 మిలియన్ డాలర్లు (రూ.252.5 కోట్లు) పలకడం గమనార్హం.