ఈరోజు మళ్లీ రుజువు చేశాం: జో బైడెన్

ఉగ్రవాదులు ఎక్కడ దాగి ఉన్నా మేము కనుగొని హతమార్చడానికి ఎంతో సమయం పట్టదని ఈరోజు మళ్లీ రుజువు చేశాం" అని అమెరికా అధ్యక్షుడు జో బైడెన్ పేర్కొన్నారు. ఇదిలావుంటే అల్‌ఖైదా చీఫ్ ఇమన్ అల్ జవహరిని అమెరికా సెంట్రల్ ఇంటెలిజెన్స్ ఏజెన్సీ (సీఐఏ) హతమార్చింది. అఫ్ఘనిస్థాన్‌ రాజధాని కాబుల్‌లో జరిగిన డ్రోన్ దాడిలో జవహరీని అంతమొందిందినట్లు అమెరికా అధ్యక్షుడు జో బైడెన్ తన అధికారిక ట్విటర్ అకౌంట్‌లో పోస్ట్ చేశారు. ఉగ్రవాద సంస్థ వ్యవస్థాపకుడు ఒసామా బిన్ లాడెన్‌ను 2011లో హతమార్చిన తర్వాత అల్‌ఖైదాపై మళ్లీ ప్రతీకారం తీర్చుకున్నామని అమెరికన్ అధికారులు పేర్కొన్నారు. ఆదివారం తెల్లవారుజామున ఈ దాడి జరిగినట్లు తెలుస్తోంది.. దీనిపై పూర్తి స్పష్టత ఇవాళ సాయంత్రం విడుదలయ్యే అవకాశం ఉంది.

ఈజిప్ట్ వైద్యుడిగా పేరొందిన జవహరీ సెప్టెంబర్ 11, 2001న యునైటెడ్ స్టేట్స్‌లో జరిగిన దాడుల్లో నాలుగు విమానాలను హైజాక్ చేయడంలో కీలక వ్యక్తి. ఈ దాడుల్లో వరల్డ్ ట్రేడ్ సెంటర్ (డబ్ల్యూటీసీ)లోని రెండు టవర్లను 2 విమానాలు ఢీకొన్నాయి. కాగా మూడో విమానం అమెరికా రక్షణ మంత్రిత్వ శాఖ అంటే పెంటగాన్‌ను ఢీకొట్టింది. నాలుగో విమానం షాంక్‌విల్లేలోని పొలంలో కూలిపోయింది. ఈ ఘటనలో 3,000 మంది చనిపోయారు.

"అమెరికా తన పౌరులను రక్షించడంలో కోసం ఎల్లవేళలా అండగా ఉంటుంది. అదేవిధంగా మాకు హాని కలిగించే వారికి ప్రతీకారం తీర్చుకునే తీరుతాం. ఉగ్రవాదులు ఎక్కడ దాగి ఉన్నా మేము కనుగొని హతమార్చడానికి ఎంతో సమయం పట్టదని ఈరోజు మళ్లీ రుజువు చేశాం" అని అమెరికా అధ్యక్షుడు జో బైడెన్ పేర్కొన్నారు.

అల్ జవహరీ ఆపరేషన్‌పై అమెరికన్ అధికారి మాట్లాడుతూ.. ఆప్ఘన్ రాజధాని కాబూల్‌లో సీఐఏ ఆదివారం డ్రోన్ దాడి చేసిందని చెప్పారు. అప్ఘనిస్థాన్‌లో అల్ ఖైదాపై యునైటెడ్ స్టేట్స్ యాంటీ టెర్రరిస్ట్ ఆపరేషన్ ప్రారంభించిందని.. ఆపరేషన్ పూర్తిగా విజయవంతమైందని.. ఈ దాడుల్లో పౌరులకు ఎలాంటి ప్రాణ నష్టం జరగలేదని మరో అధికారి స్పష్టం చేశారు.

ఈ ఘటనపై తాలిబాన్ ప్రతినిధి జబీహుల్లా ముజాహిద్ స్పందిస్తూ అంతర్జాతీయ నియమాలను ఉల్లంఘిస్తూ దాడి చేశారంటూ తీవ్రంగా ఖండించారు. ఆదివారం తెల్లవారుజామున కాబుల్‌లో భారీ పేలుడు సంభవించిందని అఫ్ఘన్ అంతర్గత వ్యవహారాల మంత్రిత్వ శాఖ ప్రతినిధి అబ్ధుల్ నఫీ తాకోర్ చెప్పారు. షేర్పూర్‌లోని ఒక ఇంటిపై డ్రోన్ దాడి జరిగిందని.. అయితే, ఎలాంటి ప్రాణ నష్టం జరగలేదని ఆయన స్పష్టం చేశారు.