ఏపీలో నేడు అతి భారీ వర్షాలు
Andhra Pradesh Telugu | Suryaa Desk | Published : Fri, Aug 05, 2022, 11:53 AM
ఏపీ రాష్ట్రానికి భారీ వర్ష సూచిక ఉందని వాతావరణ శాఖ సూచించింది. పశ్చిమ మధ్య బంగాళాఖాతంపై ఉపరితల ఆవర్తనం కొనసాగుతోందని.. దాంతో పలు జిల్లాల్లో భారీ నుంచి అతిభారీ వర్షాలు పడే అవకాశం ఉంది. మిగతా జిల్లాల్లో మోస్తరు నుంచి భారీ అవకాశాలు పడొచ్చని వాతావరణ శాఖ అంచనా వేస్తోంది. అదేవిధంగా 7న వాయువ్య బంగాళాఖాతంలో అల్పపీడనం ఏర్పడనుందని.. ఫలితంగా 7, 8 తేదీల్లో దక్షిణ కోస్తాలో వర్షాలు కురిసే అవకాశం ఉందని ఐఎండీ వెల్లడించింది.
ఉపరితల ఆవర్తనం ప్రభావంతో ఇవాళ భారీ వర్షాలు పడే అవకాశం ఉంది. కర్నూలు, నంద్యాల, అనంతపురం, శ్రీ సత్యసాయి, అన్నమయ్య, తిరుపతి, నెల్లూరు, అల్లూరి సీతారామరాజు, పార్వతీపురం మన్యం జిల్లాల్లో వర్ష ప్రభావం ఎక్కువగా ఉంటుందని వాతావరణ శాఖ సూచించింది. నెల్లూరు జిల్లాలోని కొన్ని ప్రాంతాల్లో కుండపోత వర్షాలు పడొచ్చని హెచ్చరించింది. వైఎస్సార్, ప్రకాశం, గుంటూరు, తూర్పుగోదావరి, కాకినాడ, అనకాపల్లి, విజయనగరం, విశాఖపట్నం జిల్లాల్లో సాధారణం నుంచి మోస్తరు వర్షాలు పడే అవకాశం ఉంది.
నైరుతి రుతుపవనాలు ప్రారంభమయ్యాక ఇప్పటివరకు ఈ సీజన్‌లో బంగాళఖాతంలో రెండు అల్పపీడనాలు ఏర్పడ్డాయని.. 7వ తేదీన మూడోది ఏర్పడుతుందని వాతావరణ శాఖ చెప్పింది. అయితే, ఈ అల్పపీడనాలు వాయుగుండాలుగా బలపడలేదని చెప్పింది. అల్పపీడన ప్రభావంతో తీరం వెంట గంటకు 45-55, గరిష్టంగా 60 కిలోమీటర్ల వేగంతో ఈదురుగాలులు వీస్తాయని.. మత్స్యకారులు చేపల వేటకు వెళ్లొద్దంటూ వాతావరణ శాఖ అధికారులు హెచ్చరించారు.
|
|