బీహార్ లో నితీష్ నిర్ణయంతో ...బీజేపీకి లాభమా...నష్టమా

బీహార్ లో అనుహ్యంగా మారిన రాజకీయాలతో దేశ రాజకీయాలలో  చక్రం తిప్పుతున్న బీజేపీకి లాభమా లేక నష్టమా అన్న దిశగా చర్చ సాగుతోంది. బీజేపీతో జేడీయూ స్నేహబంధాన్ని తెంచుకుంది. ఎన్డీయే నుంచి బయటకొచ్చిన నితీశ్ కుమార్ ఆర్జేడీ సాయంతో మరోసారి బిహార్ సీఎం పగ్గాలు చేపడుతున్నారు. ఇంతకు ముందే ఓసారి ఆర్జేడీతో కలిసి ప్రభుత్వాన్ని ఏర్పాటు చేసిన నితీశ్.. మరోసారి తన పాత స్నేహితుడికి దగ్గరయ్యారు. మహారాష్ట్రలో ఏక్‌నాథ్ షిండేను తెరపైకి తెచ్చిన తరహాలో.. బిహార్లోనూ బీజేపీ ప్రయత్నాలు చేస్తోందనే అనుమానంతో నితీశ్ కుమార్ కమలం పార్టీకి దూరమయ్యారు.

నితీశ్ దూరం కావడంతో బిహార్లో తాము మరింత బలపడటానికి ఇదే సరైన తరుణమని బీజేపీ చెబుతోంది. 2019 లోక్ సభ ఎన్నికల్లో ఎన్డీయే కూటమి బిహార్‌లో 40 సీట్లకు గానూ 39 స్థానాల్లో గెలుపొందింది. 2014 ఎన్నికల్లోనూ బీజేపీ, ఇతర చిన్న పార్టీలతో కలిసి సత్తా చాటింది. నితీశ్ దూరం కావడంతో.. 2024 ఎన్నికల్లో ఈ స్థాయిలో సీట్లు గెలవడం బీజేపీకి సాధ్యం కాకపోవచ్చనే భావన వ్యక్తమవుతోంది.

గత కొంత కాలంగా ‘ఢిల్లీ’కి దూరంగా ఉంటున్న నితీశ్ కుమార్ వైఖరిలో మార్పును గమనించిన బీజేపీ.. కేంద్ర మంత్రి ధర్మేంద్ర ప్రధాన్‌ను రెండుసార్లు పట్నా పంపింది. జేడీయూతో తాము స్నేహాన్ని కోరుకుంటున్నామనే సంకేతాలను పంపింది. 2025 వరకు నితీశ్ కుమారే బిహార్ సీఎంగా కొనసాగుతారని కేంద్రం హోం మంత్రి అమిత్ షా ఇటీవలే భరోసా కూడా ఇచ్చారు. కానీ అవేవీ ఫలితాన్ని ఇవ్వలేదు.

2015 బిహార్ అసెంబ్లీ ఎన్నికల్లో ఆర్జేడీ, జేడీయూ కలిసి పోటీ చేశాయి. ముస్లింలు, యాదవుల ఓటు బ్యాంకు అత్యధికంగా ఉన్న ఆర్జేడీ దాదాపు 30 శాతం ఓట్లను సొంతం చేసుకుంది. ఆర్జేడీ కంటే జేడీయూకు తక్కువ సీట్లు వచ్చినప్పటికీ నితీశ్ కుమార్ బిహార్ సీఎం అయ్యారు. బీజేపీ ప్రతిపక్షంలో కూర్చుంది. ఆ తర్వాత మళ్లీ జేడీయూ, బీజేపీ మధ్య స్నేహం కుదిరింది. 2020 బిహార్ అసెంబ్లీ ఎన్నికల్లో ఆర్జేడీ ఒంటరిగా బరిలోకి దిగి 75 స్థానాలు సాధించగా.. బీజేపీ 74 సీట్లు, జేడీయూ 43 సీట్లు గెలిచాయి. తన పార్టీ మూడో స్థానంలో నిలిచినప్పటికీ నితీశ్ సీఎం అయ్యారు.

కానీ రెండేళ్లు కూడా తిరగక ముందే.. మహారాష్ట్ర పరిణామాల నేపథ్యంలో నితీశ్ అప్రమత్తం అయ్యారు. మళ్లీ ఆర్జేడీకి దగ్గరయ్యారు. ఈ పరిస్థితుల్లో 2024 లోక్‌సభ ఎన్నికల్లో బిహార్లో బీజేపీ ఎన్ని సీట్లు సాధిస్తుందనే ఆసక్తికరంగా మారింది. బీజేపీ మాత్రం తాము మెరుగైన ఫలితాలను సాధిస్తామని ధీమా వ్యక్తం చేస్తోంది.