యాప్ లతో కాస్త జాగ్రత్త...లేకపోతే మీ సమాచారమంతా తస్కరణ
national | Suryaa Desk | Published : Mon, Aug 15, 2022, 10:52 PM
వివిధ కార్యక్రమాల కోసం మనకు అనేక యాప్ లు అందుబాటులోకి వస్తున్నాయి. దీంతో మన సమాచారానికి కూడా గోప్యత లేకుండా పోతోంది. యాప్ ల సాయంతో మాల్వేర్లను ఫోన్లలోకి ప్రవేశపెట్టేందుకు హ్యాకర్లు ప్రయత్నిస్తుంటారన్న సంగతి తెలిసిందే. ఒక్కసారి మాల్వేర్ చొరబడిందంటే ఆ ఫోన్ లోని సమాచారం అంతా తస్కరణకు గురవుతుంది. తాజాగా డ్రాకేరిస్ అనే మాల్వేర్ కూడా ఆండ్రాయిడ్ యూజర్ల పాలిట విలన్ లా పరిణమించిందంటూ ఫేస్ బుక్ హెచ్చరికలు చేసింది. ఈ మాల్వేర్ ఫోన్ లో ప్రవేశిస్తే వాట్సాప్, యూట్యూబ్ లను కనిపించకుండా మాయం చేస్తుందని వెల్లడించింది. నకిలీ, థర్డ్ పార్టీ యాప్ ల పట్ల జాగ్రత్తగా ఉండాలని సూచించింది.
ముఖ్యంగా, గేమింగ్ యాప్ ల సాయంతో డ్రాకేరిస్ మాల్వేర్ ను స్మార్ట్ ఫోన్లలోకి చొప్పిస్తున్నారని ఫేస్ బుక్ పేర్కొంది. ఈ మాల్వేర్ ఫోన్ లోని యాంటీ వైరస్ సాఫ్ట్ వేర్ ను కూడా ఏమార్చగలదని వివరించింది. బిట్టర్ ఏపీటీ అనే హ్యాకింగ్ గ్రూప్ ఈ మాల్వేర్ సృష్టికర్త అని వెల్లడించింది. యూజర్ అనుమతి లేకుండానే ఫోన్ లో ఏమైనా చేసేందుకు ఈ డ్రాకేరిస్ మాల్వేర్ దోహదపడుతుందని వివరించింది. గూగుల్ ప్లే స్టోర్ నుంచి ప్రొటెక్షన్ ఉన్న యాప్ లను మాత్రమే ఇన్ స్టాల్ చేసుకోవాలని, థర్డ్ పార్టీ ఏపీకే సైట్ల నుంచి యాప్ లను డౌన్ లోడ్ చేసుకోరాదని ఫేస్ బుక్ స్పష్టం చేసింది.
|
|