నెంబర్ లో నేముంది..!

కథలను రివీల్ చేసే టైటిల్స్ కొన్నైతే, కథను గోప్యంగా ఉంచుతూ ప్రేక్షకులను థియేటర్ కు రప్పించే టైటిల్స్ కొన్ని!! చిత్రం ఏమంటే… ఇప్పుడు పలువురు దర్శక నిర్మాతలు అంకెలతో ప్రేక్షకులను ఆకట్టుకునే ప్రయత్నం చేస్తున్నారు. ఈ యేడాది ఇప్పటికే ‘త్రీ మంకీస్’, ‘పలాస 1978’… ఇవాళే ‘302’ చిత్రాలు జనం ముందుకు రాగా… మరో పది, పన్నెండు ఈ తరహా సినిమాలు ప్రేక్షకులను అలరించడానికి వివిధ దశల్లో సెట్స్ పై ఉన్నాయి. యాంకర్ ప్రదీప్ తొలిసారి హీరోగా నటిస్తున్న సినిమా ‘30 రోజుల్లో ప్రేమించడం ఎలా?’. ఈ మూవీ ఇదే నెల 25న రాబోతోంది.

దర్శకుడు సుకుమార్ నిర్మాతగా మారి తీసిన సినిమా ‘కుమారీ 21 ఎఫ్’. అందులోని అంకె తన విజయానికి కారణం అనుకున్నాడేమో, తాజాగా నిఖిల్ హీరోగా బన్నీ వాసుతో తీయబోతున్న సినిమాకు ’18 పేజీస్’ అనే పేరు పెట్టాడు. ‘కుమారి 21 ఎఫ్’ ఫేమ్ పల్నాటి సూర్య ప్రతాపే దీనికి దర్శకుడు కావడం విశేషం. చిత్రం ఏమంటే… ఈ సినిమా మొదలైన రోజే సుమంత్ అశ్విన్ తో ‘దండుపాళ్యం’ ఫేమ్ శ్రీనివాసరాజు నిర్మిస్తున్న చిత్రానికి ‘18 ప్లస్’ అనే పేరును ఖరారు చేశారు. ఇదిలా ఉంటే… 1983వ సంవత్సరం ఇండియన్ క్రికెట్ కు మర్చిపోలేనిది. తొలిసారి క్రికెట్ లో వరల్డ్ కప్ ను అందుకుంది భారత జట్టు. ఆ విజయోత్సవం నేపథ్యంలో ‘83’ సినిమా తెరకెక్కుతోంది.

ఉన్నంతలో కాస్తంత భిన్నమైన టైటిల్స్ కు ప్రాధాన్యం ఇస్తుంటాడు యువ కథానాయకుడు సందీప్ కిషన్. ఇప్పుడు హాకీ నేపథ్యంలో తెరకెక్కుతున్న అతని చిత్రానికి ‘ఎ 1 ఎక్స్ ప్రెస్’ అనే పేరు పెట్టారు. లావణ్య త్రిపాఠి హీరోయిన్ గా నటిస్తున్న ఈ మూవీతో డెన్నిస్ జీవన్ కనుకొలను దర్శకుడిగా పరిచయం అవుతున్నాడు. వయసు ప్రభావం ప్రేమ మీద చాలా ఎక్కువ ఉంటుందన్నది ప్రతి ఒక్కరూ అంగీకరించే మాటే. అందుకే ‘15-18-24’ సంవత్సరాల్లో ఎలాంటి ప్రభావం ఉంటుందనేది ప్రేక్షకులకు తెలుపుతూ అదే పేరుతో మాడుపూరి కిరణ్ కుమార్ ఓ సినిమా తెరకెక్కిస్తున్నారు. సింగర్ కమ్ యాక్టర్ నోయల్ ప్రధాన పాత్రలో ‘14’ పేరుతోనూ ఓ సినిమా రూపుదిద్దుకుంటోంది. లక్ష్మీ శ్రీనివాస్ దర్శకత్వం వహిస్తున్న ఈ సినిమాలో రతన్, విశాఖ జంటగా నటిస్తున్నారు. ఇదే విధంగా ‘1992’, ‘ఏప్రిల్ 28న ఏం జరిగింది?’, ‘ఎస్ 5 - నో ఎగ్జిట్’, ‘రూపం ఎస్ 20 ప్లస్’, ‘ఎస్.ఆర్. కళ్యాణమండపం, ఎస్టాబ్లిష్డ్ 1975’ చిత్రాలూ జనం ముందుకు రాబోతున్నాయి. బి.ఎ.రాజు తనయుడు శివ దర్శకుడిగా పరిచయం అవుతున్న యాక్షన్ థ్రిల్లర్ మూవీకీ ‘22’ అనే ఆసక్తికరమైన పేరు పెట్టారు. రూపేశ్ పోలీస్ ఆఫీసర్ గా నటిస్తున్న ఈ చిత్రం అతి త్వరలోనే జనం ముందుకు రాబోతోంది. మరి రొటీన్ కు భిన్నంగా అంకెలతో ఆకట్టుకోవాలని భావిస్తున్న ఈ దర్శక నిర్మాతలకు ఎలాంటి విజయం దక్కుతుందో చూడాలి.