ఖాకీలలో కొత్త ఉత్సాహాన్ని నింపిన హీరో విజయ్ దేవరకొండ
cinema | Suryaa Desk | Published : Wed, Apr 15, 2020, 11:02 AM
కరోనా వైరస్ వ్యాప్తి చెందుతున్న ఈ సమయంలో తమ ప్రాణాలకు తెగించి ఉద్యోగాలు చేస్తున్న తెలంగాణ పోలీస్ అధికారులతో టాలీవుడ్ సెన్సేషన్ స్టార్ విజయ్ దేవరకొండ సరదాగా ముచ్చటించారు. గ్రేటర్ హైదరాబాద్ పోలీసు కమిషనరేట్ లో పోలీసు అధికారులతో వీడియో కాన్ఫరెన్స్ లో పలకరించారు. నిరంతరం పనిచేస్తూ అలసట పొందుతున్న పోలీస్ సిబ్బందికి విజయ్ పలకరింపులు, మాటలు కొత్త ఉత్సాహాన్నిచ్చాయని అధికారులు పేర్కొన్నారు. ప్రతి రోజు సాయంత్రం పోలీస్ కమిషనరేట్ లో జరిగే వీడియో కాన్ఫరెన్స్ లో విజయ్ దేవరకొండ పాల్గొనడం పోలీసు అధికారులు, కానిస్టేబుల్స్ ఇతర సిబ్బందిలో కొత్త ఉత్సాహం కనపడింది. చాలా మంది పోలీస్ అధికారులు విజయ్ కి థాంక్స్ చెబుతూ తమ ఆనందాన్ని పంచుకున్నారు. పోలీసులలో ఉత్సాహాన్ని నింపేందుకు సమయం ఇచ్చిన విజయ్ కు పోలీస్ కమిషనర్ అంజనీ కుమార్ తో పాటు ఆయన సిబ్బంది ప్రత్యేక కృతజ్ఞతలు తెలిపారు. ఈ సందర్భంగా పోలీసులు అడిగిన పలు ప్రశ్నలకు విజయ్ వారిని ఉత్సాహ పరుస్తూ సమాధానాలు ఇచ్చారు. మీరు ఒకసారి పోలీస్ చెక్ పోస్ట్ ల వద్దకు వచ్చి ప్రజలను బయటకు రావొద్దని కోరాలి అని పోలీసులు అన్నారు. దీనికి విజయ్ తప్పకుండా వస్తానని కానీ తాను వచ్చినప్పుడు లాఠీలకు పనిచెప్పకూడదు అలాంటి పర్మీషన్ లెటర్ తనకు ఇస్తే తప్పకుండా వస్తానని అన్నారు. అలాగే మీరు పోలీసు అయితే ఈ పరిస్థిలో ఎలా ఫీల్ అయ్యే వారు అని పోలీసులు అడిగితే.. చాలా బాధ్యతగా ఫీల్ అయ్యే వాడిని అని.. కమిషనర్ ఆదేశాల మేరకు పనిచేసే వాడిని అని విజయ్ అన్నారు.
|
|