నోయెల్ ఎస్తేర్ ప్రేమ పెళ్లి

దక్షిణాది సినీ పరిపరిశ్రమకు చెందిన మరో ప్రేమ జంట పెళ్లి బంధంతో ఒక్కటైంది. సింగర్, నటుడు నోయెల్.. ‘జయజానకి నాయక’ ఫేమ్, హీరోయిన్ ఎస్తేర్ వివాహం బంధం ద్వారా ఒక్కటయ్యారు. శుక్రవారం (జనవరి 4) మధ్యాహ్నం క్రైస్తవ మత పద్ధతిలో వీరి వివాహం జరిగింది. వీరి పెళ్లికి దర్శకధీరుడు ఎస్‌.ఎస్‌. రాజమౌళి, రమ హాజరయ్యారు. పెళ్లి వేడుక‌లో నోయ‌ల్ స్నేహితులు సంద‌డి చేశారు. నటి ఎస్తేర్‌ నోరోన్హా స్వస్థలమైన మంగళూరు (కర్ణాటక)లో వీరి వివాహం జరిగింది. 

కొంత కాలంగా ప్రేమలో ఉన్న నోయెల్, ఎస్తేర్ జంట పెద్దల అనుమతితో పెళ్లి చేసుకున్నారు. వీరి నిశ్చితార్థం ఇటీవలే జరిగింది. తమ పెళ్లి ఫొటోను నోయెల్‌ ట్విటర్‌ ద్వారా షేర్ చేశాడు. తామిప్పుడు ఇద్దరం కాదని, ఒక్కటే అని పేర్కొన్నాడు. తన హృదయానికి ఆమే రాణి అని నోయెల్‌ ట్వీట్‌ చేశాడు. అందరి ఆశీస్సులు కావాలని కోరాడు. ‘జబర్దస్త్’ నటుడు నవీన్, యాంకర్లు అనసూయ, రష్మీ తదితరులు నోయెల్ దంపతులకు శుభాకాంక్షలు తెలిపారు. 

గాయకుడు, ర్యాపర్‌గానే కాకుండా.. నోయెల్‌ మంచి నటుడిగానూ గుర్తింపు పొందాడు. మగధీర, ఈగ, కుమారి 21 ఎఫ్‌, నాన్నకు ప్రేమతో, రంగస్థలం, హలో గురు ప్రేమ కోసమే, ప్రేమమ్ తదితర సినిమాల్లో స‌పోర్టింగ్ క్యారెక్టర్స్ వేసి మెప్పించాడు. ఇటీవల విడుదలైన ‘పడి పడి లేచె మనసు’ సినిమాలోనూ నోయెల్ నటించాడు. టీవీ కార్యక్రమాలతోనూ చాలా పాపులారిటీ సంపాదించాడు. తమిళ్‌లో నోయెల్ హోస్ట్ చేస్తున్న ‘సరిగమపా’ ప్రోగ్రామ్‌కు విశేష ఆదరణ ఉంది. 

మంగళూరుకు చెందిన ఎస్తేర్‌ నోరోన్హా తేజ దర్శకత్వంలో వచ్చిన ‘1000 అబద్ధాలు’ సినిమా ద్వారా తెలుగు ప్రేక్షకులకు హీరోయిన్‌గా పరిచయమైంది. ఆ తర్వాత సునీల్ హీరోగా తెరకెక్కిన ‘భీమవరం బుల్లోడు’ సినిమాలో నటించింది. అనంతరం చాలా గ్యాప్ తర్వాత ‘జయ జానకి నాయక’ సినిమాలో తళుక్కుమంది. ఈ చిత్రానికి బోయపాటి శ్రీను దర్శకత్వం వహించారు.. 

తెలుగుతో పాటు హిందీ, కన్నడ భాషలకు చెందిన పలు సినిమాల్లోనూ ఎస్తేర్ నటించింది. ప్రస్తుతం హిందీ, మ‌రాఠీ, తెలుగు, త‌మిళ ప్రాజెక్టుల‌తో బిజీగా ఉంది. ఇటీవల వీరిద్దరూ కలిసి కొంక‌ణి భాషలో ‘డిస్పెకిటో’ పేరుతో చేసిన క‌వ‌ర్ సాంగ్‌కు మంచి స్పందన వచ్చింది. ఈ పాటకు యూ ట్యూబ్‌లో 2 లక్షలకు పైగా వ్యూస్ వ‌చ్చాయి.