ఎన్నిసార్లు ఫెయిల్ అయిన కొత్తగా ట్రై చేస్తా : కళ్యాణ్ రామ్

కొందరు హీరోలు నటనతో ఆకట్టుకుంటారు. వ్యక్తిత్వ పరంగా వారికి అంత మంచి ఇమేజ్ ఉండదు. కానీ కొందరు హీరోలు సినిమాల విషయంలో నిరాశ పరిచినా తమ వ్యక్తిత్వంతో ఆకట్టుకుంటూ ఉంటారు. అలాంటి హీరోల్లో నందమూరి కళ్యాణ్ రామ్ ఒకడు. అతడి సినిమాల్లో సక్సెస్ రేట్ చాలా చాలా తక్కువ. ఇండస్ట్రీ పరిచయమై 17-18 ఏళ్లు అవుతుండగా.. ఇన్నేళ్లలో అతడికి దక్కిన నిఖార్సయిన హిట్లు.. ‘అతనొక్కడే’, ‘పటాస్’ మాత్రమే. మిగతా సినిమాల్లో ఏవీ ఆశించిన ఫలితాన్నివ్వలేదు.

కానీ మంచి సినిమా చేయాలని.. కొత్తగా ఏదోగా చూపించాలని సిన్సియర్‌గా ట్రై చేస్తుంటాడీ నందమూరి హీరో. మీడియాతో ఎప్పుడు మాట్లాడినా అతి చేయడు. తన తప్పుల గురించి వినమ్రంగా ఒప్పుకుంటాడు. తాను స్టార్ కాదని కూడా చెబుతాడు. అతనెప్పుడు మాట్లాడినా ఒక నిజాయితీ కనిపిస్తుంది. ‘118’ ప్రి రిలీజ్ ఈవెంట్లో కూడా అది కనిపించింది.

తన సినిమాలు వరుసగా ఫెయిలవుతుండటంపై కళ్యాణ్ రామ్ ఓపెన్‌గా మాట్లాడాడు. మంచి సినిమా అందించడం కోసం తాను తన వంతుగా చేయాల్సిందంతా చేస్తూనే ఉన్నానని.. కానీ ఎక్కడో తేడా జరుగుతోందని.. తాను ఫెయిలవుతున్నానని కళ్యాణ్ రామ్ చెప్పాడు. అలాగని తాను ప్రయత్నం మాత్రం మాననని చెప్పాడు. ఈ సందర్భంగా గతంలో ‘టెంపర్’ సినిమా ఆడియో వేడుకలో తన తమ్ముడు ఎన్టీఆర్ చెప్పిన మాటల్ని  కళ్యాణ్ రామ్ గుర్తు చేసుకున్నాడు.

ఎన్ని ఫెయిల్యూర్లు వచ్చినా అభిమానులకు నచ్చే సినిమా కోసం ప్రయత్నం చేస్తూనే ఉంటానని తారక్ అన్నాడని.. తాను కూడా అదే మాట చెబుతున్నానని కళ్యాణ్ రామ్ అన్నాడు. ‘118’ సినిమా గురించి ఎంతో మాట్లాడాలని ఉందని.. కానీ ఇప్పుడేమీ మాట్లాడనని అతనన్నాడు. సినిమా రిలీజయ్యాక మాత్రం కచ్చితంగా అరగంట  మాట్లాడతానంటూ కళ్యాణ్ రామ్ తన ప్రసంగాన్ని ముగించాడు. మొత్తానికి చాలా నిజాయితీగా మాట్లాడ్డం ద్వారా కళ్యాణ్ రామ్ మరోసారి జనాల దృష్టిని ఆకర్షించాడు.