బాస్‌ను ఇంప్రస్ చేయమన్నారు : శ్వేతారెడ్డి

తెలుగులో బిగ్ బాస్ రియాలిటీ షో ఎంత పాపులర్ అయ్యిందో అందరికీ తెలిసిందే. తొలి సీజన్‌కు జూనియర్ ఎన్టీఆర్ లాంటి స్టార్ హీరో హోస్ట్‌గా వ్యవహరించడంతో మంచి పాపులారిటీ వచ్చింది. అంతేకాకుండా వ్యాఖ్యాతగా ఎన్టీఆర్ అదరగొట్టడంతో షో సూపర్ డూపర్ హిట్ అయ్యింది. ఇక, రెండో సీజన్‌కు నాని వ్యాఖ్యాతగా వ్యవహరించారు. సుధీర్ఘంగా సాగిన ఈ సీజన్‌ హాట్ హాట్‌గా నడిచింది. ఇప్పుడు మూడో సీజన్ కోసం బిగ్ బాస్ అభిమానులు ఆసక్తిగా ఎదురుచూస్తున్నారు. ఈ మూడో సీజన్‌కు కింగ్ నాగార్జున వ్యాఖ్యాతగా వ్యవహరిస్తుండటంతో ఆ ఆసక్తి మరింత ఎక్కువైంది. అయితే, ఇంత మంచి ఇమేజ్ ఉన్న బిగ్ బాస్ షోపై ఇప్పుడొక మచ్చ పడింది. 

యూట్యూబ్‌ ఛానెళ్లలో ప్రముఖులను ఇంటర్వ్యూలు చేయడం ద్వారా పాపులర్ అయిన జర్నలిస్టు శ్వేతారెడ్డి.. బిగ్ బాస్‌ షోపై తీవ్ర ఆరోపణలు చేశారు. సినీ పరిశ్రమలో కాస్టింగ్ కౌచ్ మాదిరిగా బిగ్ బాస్ షోలోనూ ‘కమిట్‌మెంట్స్’ ఉన్నాయని ఆరోపిస్తున్నారు. అక్కడ కూడా బాస్‌ను ఇంప్రస్ చేయాల్సి ఉంటుందని అంటున్నారు. ఈ కారణాల వల్లే తాను ఆ షో నుంచి తప్పుకున్నానని చెబుతున్నారు. ఇటీవల పలు మీడియా ఛానెళ్లలో మాట్లాడిన శ్వేత.. తాను బిగ్ బాస్‌ సీజన్ 3కి ఎంపికైన తీరు, ఎందుకు తప్పుకోవాల్సి వచ్చింది వంటి విషయాలను క్షుణ్ణంగా వివరించారు. 

‘రవికాంత్ అనే వ్యక్తి స్టార్ మా నుంచి నాకు కాల్ చేశారు. బిగ్ బాస్‌కి మిమ్మల్ని సెలెక్ట్ చేశాం అని చెప్పారు. ఒకసారి కలవాలి అంటే ఆఫీస్‌కి రండి అని చెప్పాను. నా ఆఫీసుకొచ్చి నన్ను కలిశారు. వివరాలన్నీ చెప్పారు. మీకు ఆసక్తి ఉందా అని అడిగారు. నేను కూడా ఓకే చెప్పాను. ఆ తరవాత రెండు మూడు మీటింగ్‌లు వరుసగా జరిగాయి. రెండోసారి బంజారాహిల్స్‌లోని బాస్కిన్ రాబిన్స్‌లో కలిశాం. ఆ తరవాత శ్రీనగర్ కాలనీలోని మింట్ లీఫ్ రెస్టారెంట్‌లో మీటింగ్‌లు జరిగాయి. అగ్రిమెంట్ అయ్యేంత వరకు నేను ఈ విషయాన్ని ఎవ్వరితోనూ చెప్పలేదు. నా కుటుంబ సభ్యులకు కూడా చెప్పలేదు. 

అగ్రిమెంట్ అయ్యిన తరవాత 10 నుంచి 15 పేజీల అగ్రిమెంట్ పేపర్స్ మీద సంతకం చేశాను. ఆ సమయంలో రవికాంత్‌తో పాటు మరో కోఆర్డినేటర్ రఘు, స్టార్ మా హెచ్ఆర్ పర్సన్ కూడా ఉన్నారు. వాళ్లతో ఈ అగ్రిమెంట్‌‌తో అంతా అయిపోయినట్టేనా, నేను ఈ విషయాన్ని బయటపెట్టొచ్చా అని అడిగాను. అవునండి ఈ అగ్రిమెంట్‌తో అంతా అయిపోయినట్టే అని చెప్పారు. ఈ అగ్రిమెంట్ డూప్లికేట్ కాపీలు నాకు ఎప్పుడిస్తారు అని అడిగాను. రెండు మూడు వారాలు పడుతుందన్నారు. అంతేకాకుండా పారితోషికం కూడా ఫైనల్ చేశారు. హౌజ్‌లోకి వెళ్లే ముందు కొంత మొత్తం నా అకౌంట్‌లో వేస్తామని చెప్పారు. 

కొన్ని రోజుల తర్వాత శ్యామ్ అనే ప్రోగ్రామింగ్ హెడ్ నాతో మాట్లాడారు. మింట్ లీఫ్ రెస్టారెంట్‌లో ఈ మీటింగ్ జరిగింది. ఆయన మాట్లాడే విధానం చాలా తేడాగా ఉంది. మిమ్మల్ని ఎందుకు తీసుకోవాలి?.. షోలో సెన్సేషన్ క్రియేట్ అవ్వాలంటే మీరు ఏం చేస్తారు? అని అడిగారు. తీసుకోమని నేను మిమ్మల్ని అడిగానా అని చెప్పాను. నేను నా షూటింగ్స్, నా ఇంటర్వ్యూలు పక్కన పెట్టి మీటింగులన్నింటికీ హాజరయ్యాను. అథెంటికేషన్ కూడా అయిపోయాక ఇప్పుడు అడుగుతున్నారేంటి అని అడిగాను. అది కాదు మేడమ్ మీరేమైనా స్పెషల్‌గా యాక్టివిటీస్ చేయగలరా అని అడిగారు. మీరేమైనా నా నుంచి ఆశిస్తున్నారా అని నేను అడిగాను. అదికాదు మేడం మా బాస్‌ని ఇంప్రస్ చేయగలగాలి అన్నారు’ అని శ్వేతారెడ్డి చెప్పుకొచ్చారు. 

మొత్తం మీద ఇప్పటి వరకు బిగ్ బాస్ షోలో కానీ, స్టార్ మా ఛానెల్‌లో కానీ ఇలాంటి ఆరోపణలు రాలేదు. కానీ, ఇప్పుడు మూడో సీజన్ ప్రారంభమవబోతున్న తరుణంలో శ్వేతారెడ్డి చేసిన ఆరోపణలు సంచలనంగా మారాయి. చూద్దాం దీనిపై బిగ్ బాస్ యాజమాన్యం కానీ, స్టార్ మా కానీ ఎలా స్పందిస్తారో!