'పీపుల్ స్టార్' ఆల్రెడీ ఉందని నాకు తెలియదు
cinema | Suryaa Desk | Published : Mon, Feb 24, 2025, 12:06 PM
యువ కథానాయకుడు సందీప్ కిషన్ కు 'పీపుల్ స్టార్' అనే బిరుదును ఇవ్వడంపై గత రెండు రోజులుగా సోషల్ మీడియాలోనే కాదు చిత్రసీమలోనూ చర్చ జరుగుతోంది. తాజాగా ఈ విషయంపై సందీప్ కిషన్ తో పాటు ఆ బిరుదును అతనికి ఇచ్చిన నిర్మాత అనిల్ సుంకర సైతం స్పందించారు. ఆదివారం సందీప్ కిషన్ నటిస్తున్న 30వ చిత్రం 'మజాకా' ట్రైలర్ లాంచ్ ఈవెంట్ జరిగింది. ప్రేమలో పడిన తండ్రీ కొడుకుల కథతో ఈ చిత్రాన్ని వినోదాత్మకంగా దర్శకుడు త్రినాథరావు నక్కిన తెరకెక్కించినట్టు ఈ ట్రైలర్ చూస్తుంటే అర్థమౌతోంది. ఈ నెల 26న శివరాత్రి కానుకగా 'మజాకా' జనం ముందుకు రాబోతోంది. ఈ విషయం ఇలా ఉంటే... ఈ వేదికపై 'పీపుల్స్ స్టార్' అనే బిరుదుపై సందీప్ కిషన్ వివరణ ఇచ్చాడు. నిజానికి పేరు ముందు బిరుదులు పెట్టుకోవడంపై తనకంత ఆసక్తి ఉండదని అన్నాడు. వాటి గురించి పట్టించుకోననీ చెప్పాడు. అంతేకాదు... అసలు 'పీపుల్స్ స్టార్' అనే బిరుదు ఆర్. నారాయణమూర్తికి ఉందనే విషయమే తనకు తెలియదని అన్నాడు. దాదాపు పదిహేనేళ్ళుగా చిత్రసీమలో సందీప్ కిషన్ ఉన్నాడు. అంతేకాకుండా అతని మేనమామలు ఛోటా కె నాయుడు, శ్యామ్ కె నాయుడు సైతం ఈ రంగంలో కొన్నేళ్ళుగా సినిమాటోగ్రాఫర్స్ గా రాణిస్తున్నారు. మరి ఇంతకాలంగా ఈ రంగంలో ప్రత్యక్ష సంబంధం ఉన్న సందీప్ కిషన్... ప్రముఖ నటుడు, దర్శక నిర్మాత ఆర్. నారాయణమూర్తికి 'పీపుల్స్ స్టార్' అనే బిరుదు ఉందని తెలియదనడం కాస్తంత విడ్డూరంగా ఉందని కొందరు చెవులు కొరుక్కుంటున్నారు.
|
|