ప్రముఖ కన్నడ నటుడు దర్శకుడు ఉపేంద్ర తన ఆరోగ్యంపై ఇటీవల వస్తున్న వార్తలను ఖండించారు
cinema | Suryaa Desk | Published : Mon, May 05, 2025, 09:06 PM
ప్రముఖ కన్నడ నటుడు, దర్శకుడు ఉపేంద్ర తన ఆరోగ్యంపై ఇటీవల వస్తున్న వార్తలను ఖండించారు. తాను సంపూర్ణ ఆరోగ్యంగా ఉన్నానని, ఎవరూ ఆందోళన చెందాల్సిన అవసరం లేదని సామాజిక మాధ్యమాల ద్వారా స్పష్టం చేశారు. సాధారణ ఆరోగ్య పరీక్షల కోసమే తాను ఆసుపత్రికి వెళ్ళినట్లు ఆయన వెల్లడించారు.గత కొంతకాలంగా ఉపేంద్ర అనారోగ్యంతో బాధపడుతున్నారని, ఆయన ఆరోగ్యం క్షీణించడంతో ఆసుపత్రిలో చేరారని కన్నడ మీడియాలో కొన్ని వార్తలు ప్రసారమయ్యాయి. ముఖ్యంగా 'యూఐ' సినిమా చిత్రీకరణ సమయంలో ఆయనకు అనారోగ్య సమస్యలు తలెత్తాయని, అవి ఇప్పుడు తీవ్రమయ్యాయని ఆ కథనాల సారాంశం.ఈ వార్తలు సోషల్ మీడియాలో వేగంగా వ్యాప్తి చెందడంతో ఆయన అభిమానులు తీవ్ర ఆందోళనకు గురయ్యారు. ఆయన త్వరగా కోలుకోవాలని ఆకాంక్షిస్తూ పలువురు సామాజిక మాధ్యమాల్లో పోస్టులు పెట్టారు. అభిమానుల ఆందోళన, మీడియా కథనాల నేపథ్యంలో ఉపేంద్ర స్వయంగా స్పందించారు.తన ఆరోగ్యం గురించి వస్తున్న పుకార్లను నమ్మవద్దని విజ్ఞప్తి చేశారు. "నేను ఆరోగ్యంగానే ఉన్నాను. సాధారణ ఆరోగ్య పరీక్షల కోసమే ఆసుపత్రికి వెళ్ళాను. దయచేసి ఎలాంటి వదంతులు నమ్మకండి" అని సామాజిక మాధ్యమంలో పోస్టు చేశారు.
|
|