కోలీవుడ్ స్టార్ హీరో అజిత్, తన కెరీర్ ప్రణాళికలపై సినిమాలు మరియు రేసింగ్ పట్ల తనకున్న దృక్పథంపై ఆసక్తికర వ్యాఖ్యలు చేశారు

వెండితెరపై యాక్షన్ హీరోగా, నిజ జీవితంలో డేరింగ్ రేసర్‌గా కోట్లాది అభిమానుల హృదయాలను గెలుచుకున్న కోలీవుడ్ స్టార్ హీరో అజిత్, తన కెరీర్ ప్రణాళికలపై, ముఖ్యంగా సినిమాలు మరియు రేసింగ్ పట్ల తనకున్న దృక్పథంపై ఆసక్తికర వ్యాఖ్యలు చేశారు. "నా దృష్టిలో రేసింగ్, సినిమాలు రెండూ ఒక్కటే. రెండింటిలోనూ రిస్క్ ఉంటుంది, రెండింటికీ అంకితభావం అవసరం" అంటూ తన అభిప్రాయాన్ని వెల్లడించారు.అజిత్ రేసింగ్‌లో పాల్గొంటూ గతంలో పలుమార్లు ప్రమాదాలకు గురైన విషయం తెలిసిందే. అయినా ఆ అభిరుచిని ఆయన ఏమాత్రం వదులుకోలేదు. ఈ విషయంపై స్పందిస్తూ, "సినిమాల్లో స్టంట్స్ చేసేటప్పుడు ఎన్నోసార్లు దెబ్బలు తగిలాయి, సర్జరీలు కూడా జరిగాయి. అంతమాత్రాన యాక్షన్ సినిమాలు చేయడం మానేయలేం కదా అలాగే, రేసింగ్‌లో ప్రమాదాలు జరిగాయని దానికి దూరం కాలేను. సినిమాలోని యాక్షన్ సన్నివేశాలకు, రేస్ ట్రాక్‌పై వేగానికి నా దృష్టిలో పెద్ద తేడా లేదు. అవి రెండూ నా అభిరుచిలో భాగమే" అని అజిత్ ఉద్ఘాటించారు.సినిమాలు చేస్తూనే రేసింగ్‌లో పాల్గొనడంపై తన ప్రణాళికను వివరిస్తూ, "రేసింగ్‌లో పాల్గొనాలంటే శారీరకంగా అత్యంత ఫిట్‌గా ఉండాలి. కార్ల రేస్ కోసం ప్రత్యేకంగా సిద్ధమవ్వాలి. ఇందుకోసం గత ఎనిమిది నెలల్లో సైక్లింగ్, స్విమ్మింగ్, కఠినమైన డైట్‌తో దాదాపు 42 కిలోల బరువు తగ్గాను. ఇలాంటి సమయంలో సినిమాలు చేస్తే, రెండింటికీ పూర్తి న్యాయం చేయలేకపోతున్నాననే భావన కలుగుతుంది. అందుకే, ఇకపై రేసింగ్ సీజన్‌లో ఉన్నప్పుడు సినిమాలకు కొంత విరామం ఇవ్వాలని నిర్ణయించుకున్నాను. రేసింగ్ పూర్తయ్యాక మళ్లీ సినిమాలపై దృష్టి సారిస్తాను" అని తెలిపారు. ఈ నిర్ణయం ద్వారా రెండు రంగాల్లోనూ అత్యుత్తమ ప్రదర్శన ఇవ్వగలనని ఆయన విశ్వాసం వ్యక్తం చేశారు.