‘కన్నప్ప’ చిత్రంపై రాంగోపాల్ వర్మ ప్రశంసల వర్షం

మంచు విష్ణు ప్రధాన పాత్రలో నటించిన భక్తిరస చిత్రం ‘కన్నప్ప’ బాక్సాఫీస్ వద్ద మంచి విజయాన్ని సాధించింది. ఈ చిత్రంపై ప్రముఖ దర్శకుడు రాంగోపాల్ వర్మ ప్రశంసల వర్షం కురిపించారు. విష్ణు నటనను కొనియాడుతూ వర్మ పంపిన వాట్సాప్ సందేశాన్ని విష్ణు తన ఎక్స్ ఖాతాలో పంచుకోగా, అది ఇప్పుడు వైరల్‌గా మారింది. వర్మ ప్రశంసలకు తాను భావోద్వేగానికి గురయ్యానని విష్ణు పేర్కొన్నారు.తాజాగా మంచు విష్ణుకు రాంగోపాల్ వర్మ పంపిన వాట్సాప్ సందేశంలో, తాను మొదటి నుంచి దేవుడిని, భక్తిని నమ్మే వ్యక్తిని కాదని స్పష్టం చేశారు. "నాకు దేవుడు, భక్తులపై నమ్మకం లేదు. అందుకే అలాంటి సినిమాలు చూడను. కానీ కాలేజీ రోజుల్లో ‘భక్త కన్నప్ప’ నాలుగుసార్లు చూశాను. ఇప్పుడు ఈ సినిమాలో తిన్నడుగా నువ్వు కేవలం నటించలేదు. ఆలయం అంతటి భక్తి, విశ్వాసానికి నిలువెత్తు రూపంలా కనిపించావు. కొన్ని సన్నివేశాల్లో నీ నటన నన్ను ఊపిరి కూడా తీసుకోనివ్వలేదు" అని వర్మ కొనియాడారు.సినిమాలోని క్లైమాక్స్ సన్నివేశం గురించి వర్మ ప్రత్యేకంగా ప్రస్తావించారు. "శివలింగం కళ్ల నుంచి వస్తున్న రక్తాన్ని ఆపడానికి తిన్నడు తన కళ్లను సమర్పించే సన్నివేశంలో నీ నటన శిఖరస్థాయిలో ఉంది. ఒక నాస్తికుడిగా నాకు ఇలాంటివి నచ్చవు. కానీ, నీ నటనతో ఆ సన్నివేశాన్ని ఇష్టపడేలా చేశావు. ఒక సాధారణ భక్తుడు, పరమభక్తుడిగా మారే క్రమంలో నువ్వు చూపించిన నిబద్ధత ఒక మాస్టర్‌క్లాస్. ఆ సమయంలో నీ ముఖంలో పలికిన హావభావాలు, భావోద్వేగాలు చూశాక చేతులెత్తి నమస్కరించాల్సిన భక్తి కళాఖండం అనిపించింది" అని ఆయన తన సందేశంలో పేర్కొన్నారు.అంతేకాకుండా, "అందరూ సినిమాలో ప్రభాస్ ఉన్నాడని థియేటర్‌కు వస్తున్నారు. కానీ ఇప్పుడు నేను కేవలం నిన్ను చూడటానికే టికెట్ కొని మరీ థియేటర్‌కు వెళుతున్నాను" అని వర్మ చెప్పడం విశేషం.వర్మ నుంచి వచ్చిన ఈ అనూహ్య ప్రశంసలకు మంచు విష్ణు భావోద్వేగానికి గురయ్యారు. ఆ మెసేజ్ స్క్రీన్‌షాట్‌ను పంచుకుంటూ, "రాము గారు.. మీరు నన్ను ఏడిపించేశారు. చాలా రోజులుగా నా కన్నీళ్లను ఆపుకుంటున్నాను. ఎందుకంటే నేను దీన్ని సాధించగలనని నమ్మాను. ఇది నా జీవితంలో అత్యంత సవాలుతో కూడిన సమయం. నేను ఎక్కడికి వెళ్లినా, ఈ సినిమాపై అనుమానం లేదా ద్వేషాన్నే చూశాను" అంటూ తన ఆవేదనను పంచుకున్నారు. ఒక నటుడిగా తన కల నెరవేరిందని ఆయన ఆనందం వ్యక్తం చేశారు.