by Suryaa Desk | Sat, Jun 29, 2024, 10:46 PM

ఈ ఏడాది నవంబరులో జరగనున్న అమెరికా అధ్యక్ష ఎన్నికలపై యావత్తు ప్రపంచ ఆసక్తిగా ఎదురుచూస్తోంది. ఎన్నికల్లో భాగంగా అభ్యర్ధుల మధ్య జరిగే చర్చ అందరి దృష్టిని ఆకర్షించింది. అమెరికా అధ్యక్షుడు జో బైడెన్, మాజీ అధ్యక్షుడు డొనాల్డ్‌ ట్రంప్‌ల మధ్య స్థానిక కాలమానం ప్రకారం గురువారం రాత్రి జరిగిన చర్చ వాడీవేడిగా జరిగింది. అమెరికాలో తీవ్ర చర్చనీయాంశంగా మారిన అబార్షన్ సహా పలు అంశాలు ఇందులో ప్రస్తావనకు వచ్చాయి. ఈ సందర్భంగా ఇరువురు నేతలు పరస్పరం ఆరోపణలు, విమర్శలు గుప్పించుకున్నారు. అయితే, ట్రంప్ ముందు బైడెన్ తేలిపోయారు. సొంత పార్టీ నాయకులే బైడైన్‌పై అసహనం వ్యక్తం చేస్తున్నారు. బైడెన్ జలుబు దగ్గుతో బాధపడుతున్నారని, అందుకే ట్రంప్‌తో చర్చలో తన వాదనలను బలంగా వినిపించలేకపోయారని వైట్‌హౌస్ వర్గాలు సమర్దించే ప్రయత్నం చేశాయి.

అయితే, డెమొక్రాట్ల మాత్రం ఒకింత నిరాశకు గురయ్యారు. ఈ నేపథ్యంలో ఆ పార్టీ అభ్యర్ధి జో బైడెన్ కాకుంటే.. మరో ఐదుగురు పేర్లు తెరపైకి వచ్చాయి. వారిలో వైస్-ప్రెసిడెంట్ కమలా హ్యారిస్, కాలిఫోర్నియా గవర్నర్ గవిన్ న్యూసన్, బైడెన్ క్యాబినెట్‌లోని మంత్రి పెటే బుట్టిజియాజ్, మిచిగాన్ గవర్నర్ గ్రెట్చన్ విట్‌మెర్, సెనేటర్ ఎలిజిబెత్ వారెన్ ముందువరుసలో ఉన్నారు. బైడెన్ కాకుంటే తొలి అవకాశం భారత సంతతికి చెందిన కమలా హ్యారిస్‌కు దక్కుతుంది. ప్రస్తుతం ఉపాధ్యక్షురాలిగా ఉన్న కమలా‌కు సెనేట్‌తో పాటు బైడెన్ యంత్రాంగంలో అపార అనుభవం ఉంది. అయితే, 2020 ఎన్నికల్లో డెమొక్రాట్ అభ్యర్ధిత్వ కోసం పోటీపడి విఫలమయ్యారు. అమె అభ్యర్ధిత్వంపై కూడా సందేహాలు వ్యక్తమయ్యాయి.