by Suryaa Desk | Sun, Nov 24, 2024, 07:09 PM

విమానాల్లో ప్రయాణం.. స్టార్ హోటల్స్‌లో విడిది.. ఇదంతా చూసి ఇదేదో బిజినెస్‌మెన్ వ్యవహారం అనుకుంటే అది మీ పొరబాటే. ఎందుకంటే ఇదేమీ పేరు ప్రఖ్యాతులు గడించిన వ్యాపారవేత్త గురించి కాదు.. పేరు మోసిన దొంగ గురించి. 16 ఏళ్లకే చోరీలు మొదలెట్టి.. 29 ఏళ్లు వచ్చేసరికి అంతర్రాష్ట్ర దొంగగా పేరుగడించిన ఓ నేరస్థుడి కథ ఇది. తిరుపతి క్రైమ్ పోలీసులు వెల్లడించిన వివరాల ప్రకారం..తిరుపతి ఎయిర్‌బైపాస్ రోడ్డులో ఉన్న వెస్ట్రన్ యూనియన్ మనీ ట్రాన్స్‌ఫర్ కార్యాలయంలో నవంబర్ 15న చోరీ జరిగింది. మధ్యాహ్న సమయంలో తాళం వేసి ఉన్న కార్యాలయంలోకి ఓ వ్యక్తి ప్రవేశించి క్యాష్ కౌంటర్‌లోని నగదు కాజేశాడు. క్యాష్ కౌంటర్‌లో ఉన్న రూ. 8 లక్షలు తీసుకుని అక్కడి నుంచి ఉడాయించాడు. దీనిపై వెస్ట్రన్ యూనియన్ మనీ ట్రాన్స్‌ఫర్ కార్యాలయం అధికారులు పోలీసులకు ఫిర్యాదు చేశారు.

ఈ ఫిర్యాదు ఆధారంగా కేసు నమోదు చేసుకుని దర్యాప్తు ప్రారంభించిన పోలీసులు.. నవంబర్ 22న శ్రీసాయి నిర్మలా కల్యాణ మండపం వద్ద అనుమానాస్పదంగా ఉన్న ఓ వ్యక్తిని అదుపులోకి తీసుకున్నారు. తమదైన శైలిలో విచారిస్తే తానే ఆ చోరీ చేసినట్లు నిందితుడు అంగీకరించాడు. పోలీసులు వెల్లడించిన వివరాల ప్రకారం నిందితుడు శ్రీకాకుళం జిల్లా సారవకోట మండలం బుడితి గ్రామానికి చెందిన అప్పలనాయుడుగా తెలిపారు. అప్పలనాయుడు కొన్నేళ్ల కిందటే ప్రకాశం జిల్లా సోమరాజపల్లిలో స్థిరపడ్డారు. నవంబర్ 15 మధ్యాహ్నం వెస్ట్రన్ యూనియన్ మనీ ట్రాన్స్‌ఫర్ కార్యాలయంలో చోరీకి పాల్పడ్డాడు.

సాధారణంగా మధ్యాహ్న సమయంలో వ్యాపారులు దుకాణాలను మూసివేసి భోజనానికి వెళ్తుంటారు. ఇదే తన చోరీలకు అనువైన సమయంగా అప్పలనాయుడు ఎంచుకున్నాడు. ప్లాన్ ప్రకారం గ్లాస్‌ డోర్‌ ఉన్న దుకాణాల కోసం అప్పలనాయుడు ముందుగా రెక్కీ నిర్వహిస్తాడు. ఆ తర్వాత మధ్యాహ్నం భోజన వేళ యజమానులు దుకాణాలు మూసివేయగానే.. తన వద్ద ఉన్న తాళాలు, స్క్రూ డ్రైవర్‌‌తో తలుపులు తెరిచి దొంగతనాలకు పాల్పడుతున్నాడు. ఇప్పటికే ఇలా విశాఖపట్నంలో చోరీ చేసిన నిందితుడు.. జైలుకు కూడా వెళ్లివచ్చాడు. నవంబర్ 11న జైలు నుంచి బయటకు వచ్చిన అప్పలనాయుడు.. విమానంలో తిరుపతికి చేరుకున్నాడు. తిరుపతిలోని ఓ స్టార్ హోటల్‌లో దిగాడు.

ఆ తర్వాత నాలుగు రోజుల పాటు ఎయిర్‌బైపాస్ రోడ్డులోని వెస్ట్రన్ యూనియన్ మనీ ట్రాన్స్‌ఫర్ కార్యాలయంపై రెక్కీ నిర్వహించిన అప్పలనాయుడు.. నవంబర్ 15వ తేదీ మధ్యాహ్నం సమయాన్ని అనువైనదిగా ఎంచుకున్నాడు. కార్యాలయంలోకి ప్రవేశించి క్యాష్ కౌంటర్‌లోని రూ.8 లక్షలు కాజేశాడు. అయితే చోరీ జరిగిన వారం రోజులకే అప్పలనాయుడిని అదుపులోకి తీసుకున్న పోలీసులు.. అతని వద్ద నుంచి రూ.6 లక్షల నగదు, స్క్రూడ్రైవర్‌ స్వాధీనం చేసుకున్నారు. విలాసాలకు అలవాటు పడిన అప్పలనాయుడు వారం రోజుల్లోనే రూ.రెండు లక్షలు ఖర్చు చేసినట్లు పోలీసులు గుర్తించారు. అప్పలనాయుడిపై ఆంధ్రప్రదేశ్‌తో పాటు తెలంగాణలోనూ సుమారుగా 18 కేసులు ఉన్నట్లు తిరుపతి పోలీసులు తెలిపారు.