by Suryaa Desk | Sun, Nov 24, 2024, 07:11 PM

ఆంధ్రప్రదేశ్ ప్రభుత్వం విద్యార్థుల జీవితాలతో చెలగాటమాడుతోందని మాజీ ముఖ్యమంత్రి, వైసీపీ అధినేత వైఎస్ జగన్ మోహన్ రెడ్డి విమర్శించారు. ఫీజు రీయింబర్స్‌మెంట్ నిధులను సకాలంలో చెల్లించకపోవటంతో విద్యార్థులు చదువు మానేయాల్సిన పరిస్థితి వస్తోందంటూ మండిపడ్డారు. విద్యార్థులపై సీఎం చంద్రబాబు నాయుడు కక్షగట్టినట్లు వ్యవహరిస్తున్నారని విమర్శించారు. చంద్రబాబు అధికారంలోకి రాగానే అన్ని రంగాల్లోనూ ఏపీ తిరోగమనంలో వెళ్తోందంటూ వైఎస్ జగన్ ఎద్దేవా చేశారు. ప్రభుత్వం నుంచి ఫీజు రీయింబర్స్‌మెంట్ డబ్బులు రాకపోవటంతో ప్రకాశం జిల్లాలో ఓ విద్యార్థి పనులకు వెళ్తున్నారంటూ వచ్చిన కథనం తనకు ఆవేదన కలిగించిందంటూ వైఎస్ జగన్ ట్వీట్ చేశారు.

" చంద్రబాబు రాగానే అన్ని రంగాల్లోనూ తిరోగమనమే కనిపిస్తోంది. ముఖ్యంగా విద్యారంగాన్ని దారుణంగా దెబ్బతీశారు. అమ్మ ఒడిని, ఇంగ్లీష్ మీడియంను, 3వ తరగతి నుంచి టోఫెల్‌, 3వ తరగతి నుంచే సబ్జెక్టు టీచర్లు, సీబీఎస్‌ఈ, సీబీఎస్‌ఈ నుంచి ఐబీ దాకా ప్రయాణం, 8వ తరగతి పిల్లలకు ట్యాబులు, బైజూస్ కంటెంట్‌, నాడు-నేడు ఇలా అన్నింటినీ రద్దుచేసి 1-12వ తరగతి విద్యార్థులను, వారి తల్లులను దెబ్బతీశారు. వసతి దీవెన, విద్యా దీవెన నిలిపేసి, డిగ్రీ, ఇంజినీరింగ్‌, డాక్టర్‌ చదువులు చదువుతున్నవారినీ తీవ్రంగా ఇబ్బందిపెడుతున్నారు. వైసీపీ హయాంలో ప్రతి త్రైమాసికం పూర్తికాగానే తల్లుల ఖాతాలో డబ్బులు జమచేసే వాళ్లం. ఇలా గత విద్యాసంవత్సరం డిసెంబర్‌ త్రైమాసికం వరకూ రూ. 12,609 కోట్లు ఒక్క విద్యాదీవెనకే ఖర్చు చేశాం. తలరాతలను మార్చేది చదువులు మాత్రమేనని గట్టిగా నమ్ముతూ వైసీపీ హయాంలో మొత్తం ఈ రెండు పథకాలకే రూ.18వేల కోట్లు వరకూ ఖర్చు చేశాం." అని వైఎస్ జగన్ ట్వీట్ చేశారు.

అయితే ఎన్నికల కోడ్ అమల్లోకి రావటంతో 2024 జనవరి - మార్చి త్రైమాసికానికి వసతిదీవెన, విద్యాదీవెన నిధులు ఇవ్వలేకపోయామన్న జగన్.. ఏప్రిల్‌ నెలలో వెరిఫికేషన్ చేసి మేలో ఇవ్వాల్సిన ఫీజు డబ్బులు ఇవ్వనీయకుండా టీడీపీ కూటమి పార్టీలు ఈసీకి ఫిర్యాదు చేశారని ఆరోపించారు. ఎన్నికలు పూర్తై అధికారంలోకి వచ్చిన తర్వాత కూడా కూటమి నేతలు ఈ డబ్బులు ఇవ్వడం లేదన్న వైఎస్ జగన్.. సుమారు రూ.2,800 కోట్లకుపైగా ఫీజులు రీయింబర్స్‌ చేయాల్సి ఉందన్నారు. మరో రూ.1,100 కోట్లు లాడ్జింగ్‌, బోర్డింగ్‌ ‌ఖర్చుల కింద వసతి దీవెన బకాయిలు కూడా ఉన్నాయని.. డిసెంబర్‌ నాటికి రూ.3,900 కోట్లకు చేరుకుంటాయని చెప్పారు. ఆంధ్రప్రదేశ్ ప్రభుత్వం తీరు చూస్తే మాటలు కోటలు దాటుతున్నాయి కానీ.. కాళ్లేమో గడప కూడా దాటడం లేదంటూ విమర్శించారు.

ఫీజులు కట్టక చదువులు పూర్తైన విద్యార్థులకు కాలేజీలలో సర్టిఫికేట్లు కూడా ఇవ్వడం లేదని.. 11 లక్షల మంది విద్యార్థులు ఇలా ఇబ్బందులు పడుతున్నారని వైఎస్ జగన్ ప్రస్తావించారు. చదువుకు నిలయమైన ఏపీలో దౌర్భాగ్యమైన పరిస్థితులు నెలకొన్నాయని.. టీడీపీ కూటమి సర్కారు అధికారంలోకి వచ్చిన తర్వాత స్కాంలు తప్ప పిల్లల చదువుల మీద శ్రద్ధ లేకుండా పోయిందంటూ ఆరోపించారు. వెంటనే తల్లికి వందనం, ఫీజు రీయింబర్స్‌మెంట్‌ సహా వసతి దీవెన డబ్బులు విడుదలచేయాలని వైఎస్ జగన్ డిమాండ్ చేశారు.