by Suryaa Desk | Sun, Nov 24, 2024, 11:00 PM

తెలుగు రాష్ట్రాలలో చలి పులి నెమ్మదిగా పంజా విసురుతోంది. రాత్రి పూట ఉష్ణోగ్రతలు రోజు రోజుకూ పడిపోతున్నాయి. దీంతో కొన్నిచోట్ల రాత్రి వేళ ఉష్ణోగ్రతలు 13 నుంచి 14 డిగ్రీల వరకూ నమోదవుతున్నాయి. పగటి పూట కూడా అత్యల్పంగా 20 నుంచి 23 డిగ్రీల ఉష్ణోగ్రతలు నమోదవుతున్నాయి. వచ్చే రోజుల్లో చలిగాలుల తీవ్రత మరింత పెరిగే అవకాశం ఉంది. వాతావరణంలో మార్పుల నేపథ్యంలో వైరల్‌ వ్యాధులు మరింత పెరిగే ప్రమాదం ఉందని వైద్యులు చెప్తున్నారు. అలాగే జలుబు, జ్వరం, దగ్గు వంటి సమస్యలు వచ్చే అవకాశం ఉందని హెచ్చరిస్తున్నారు. ఈ నేపథ్యంలోనే ఆస్తమా, సీవోపీడీ వంటి సమస్యలతో బాధపడేవారు మరిన్ని జాగ్రత్తలు తీసుకోవాలంటున్నారు.

చలి తీవ్రత పెరుగుతున్న నేపథ్యంలో వృద్ధులు, చిన్నారులు, బాలింతలు, గర్భిణులు, దీర్ఘకాలిక వ్యాధులతో బాధపడేవారు జాగ్రత్తలు తీసుకోవాలని వైద్యులు సూచిస్తున్నారు. మూడు పూటలా వేడి ఆహారమే తీసుకోవాలని సూచిస్తున్నారు. చలికాలంలో ఆహారం, నీటితో అంటువ్యాధులు వ్యాపించే ప్రమాదం ఉందని.. అందుకే కాచి చల్లార్చిన గోరు వెచ్చని నీటిని తాగాలని సూచిస్తున్నారు. ఉదయం పూట వాకింగ్ వెళ్లే అలవాటు ఉన్నవారు కూడా.. ఎండ వచ్చాక వాకింగ్ వెళ్లడం ఉత్తమమని చెప్తున్నారు. పొగమంచు కారణంగా శ్వాసకోశ సమస్యలు వచ్చే అవకాశం ఉందని.. అందుకే కాస్త ఎండ వచ్చాక వాకింగ్ చేయడం మంచిదని చెప్తున్నారు. అలా వీలుకాకపోతే సాయంత్రం పూట వ్యాయామం చేయాలని సూచిస్తున్నారు.

ఇక ఉదయమే చలికి ప్రయాణాలు చేసేవారు, బయటకు వచ్చేవారు కూడా ఉన్ని దుస్తులు ధరించాలని.. వీలైతే చేతులకు గ్లౌజులు, ముక్కు, చెవులు మూసే విధంగా మంకీ క్యాపులు ధరించాలని వైద్యులు సూచిస్తున్నారు. ఇంట్లో ఏడాదిలోపు చిన్నారులు ఉంటే వ్యక్తిగత శుభ్రతకు ప్రాధాన్యమివ్వాలని.. చేతులను శుభ్రపరుచుకున్న తర్వాతే పసిపిల్లలను తాకాలని చెప్తున్నారు. అలాగే వీలైనంత వరకూ బయట తిప్పకపోవటమే మంచిదని చెప్తున్నారు. భోజనం చేసేముందు చేతులు శుభ్రపరుచుకోవడం.. బాత్రూమ్ ఉపయోగించిన తర్వాత సబ్బుతో కాళ్లూ, చేతులు శుభ్రపరుచుకోవాలని చెప్తున్నారు. వ్యాధినిరోధక శక్తి తక్కువగా ఉన్నవారు సమతుల ఆహారాన్ని తీసుకోవాలని సూచిస్తున్నారు.