by Suryaa Desk | Mon, Nov 25, 2024, 07:50 PM

ప్రముఖ ప్రవచనకర్త, ఏపీ ప్రభుత్వ నైతిక విలువల సలహాదారు చాగంటి కోటేశ్వరరావు నేడు ముఖ్యమంత్రి చంద్రబాబును కలిశారు. సచివాలయానికి వచ్చిన చాగంటి... చంద్రబాబుతో సమావేశమయ్యారు. ఈ సందర్భంగా చంద్రబాబు... విద్యార్థులు, యువతలో నైతిక విలువలు పెంపొందించేందుకు ప్రయత్నించాలని చాగంటికి సూచించారు. మహిళలను గౌరవించడం, పెద్దలు, తల్లిదండ్రుల మాటలకు విలువ ఇవ్వడం వంటివి యువతకు నేర్పించాలని తెలిపారు. ఈ మేరకు ప్రత్యేక కార్యక్రమాల ద్వారా అవగాహన కల్పించాలని అన్నారు. పాఠశాలలు, కళాశాలలు, విశ్వవిద్యాలయాల్లో ప్రవచన కార్యక్రమాలు ఏర్పాటు చేయాలని పేర్కొన్నారు. నైతిక విలువల పతనానికి కారణమవుతున్న అంశాల నుంచి విద్యార్థులు, యువతను దూరంగా మళ్లించాలని సూచించారు. ఈ భేటీ సందర్భంగా చంద్రబాబు... చాగంటికి శాలువా కప్పి, వెంకటేశ్వరస్వామి ప్రతిమను బహూకరించారు. కాగా, చాగంటి కోటేశ్వరరావు ఇవాళ విద్యాశాఖ మంత్రి నారా లోకేశ్ ను కూడా కలిశారు.