by Suryaa Desk | Tue, Dec 24, 2024, 06:46 PM

మహారాష్ట్ర రాజధాని ముంబైలోని బాంద్రాలో నిర్మించిన ఓ పురాతన రైల్వే బ్రిడ్జిని ఇప్పుడు సరికొత్తగా నిర్మిస్తున్నారు. అయితే ఇప్పటివరకు అక్కడ ఉన్న ఆ బ్రిడ్జిని తొలగించే పనులు మొదలుపెట్టారు. బాంద్రాలోని మిథి నదిపై.. బ్రిటీష్ కాలంలో పూర్తిగా ఇనుముతో నిర్మించిన ఆ బ్రిడ్జి గత 136 ఏళ్లుగా సేవలు అందిస్తోంది. ఇక ఆ రైల్వే బ్రిడ్జిపై ఏర్పాటు చేసిన చివరి ఐరన్ స్క్రూ పైల్స్‌లో ఒకదాన్ని ఇప్పుడు తొలగించనున్నారు. ఆ స్థానంలో కాంక్రీట్ గిడ్డర్‌ను ఏర్పాటు చేయనున్నారు. 1888 నుంచి రైల్వే ట్రాక్‌లకు సపోర్ట్‌గా ఉన్న ఆ ఐరన్ స్క్రూ పైల్ స్థానంలో కొత్త సిమెంట్ గిడ్డర్ రానుంది. అయితే ఈ మరమ్మతు పనుల కోసం ఆ మార్గంలో రైలు సర్వీసులకు అంతరాయం కలగనున్నట్లు అధికారులు వెల్లడించారు. సరిగ్గా ఆ బ్రిడ్జిని ఏర్పాటు చేసిన సమయంలో బాంద్రా రైల్వే స్టేషన్‌ను నిర్మించారు.

ఇక ఈ రైల్వే బ్రిడ్జి పట్టాల కింద మొత్తం 8 పిల్లర్లు ఉన్నాయి. ఆ పిల్లర్లను పూర్తిగా ఇనుముతోనే తయారు చేశారు. ఒక్కో పిల్లర్ 8 నుంచి 10 టన్నుల బరువు ఉంటుందని రైల్వే అధికారులు వెల్లడించారు. అంతేకాకుండా ఒక్కో పిల్లర్ 15 నుంచి 20 మీటర్ల లోతులో పునాదుల్లో ఉన్నాయని చెప్పారు. ఇక ఆ పిల్లర్ల వ్యాసం సుమారు రెండు అడుగులు ఉంటుందని.. వాటి మందం 50 మిల్లీమీటర్లు ఉంటుందని పేర్కొన్నారు. ఇవి స్టీల్ గిర్డర్లను.. వాటి పైన ఉన్న రైల్వే లైన్ల బరువును మోస్తూ ఉంటాయి. ఈ పిల్లర్లు దాదర్ ఎండ్‌లోని రాతి గోడకు ఆనుకుని ఉంటాయి. ఇప్పుడు వాటన్నింటినీ కూల్చివేయనున్నారు.

ఇక భారతీయ రైల్వేలో కాస్ట్‌ ఐరన్‌కి సంబంధించిన ఇదే చివరి స్క్రూ పైల్‌ అని ఒక పశ్చిమ రైల్వే ఇంజనీర్‌ వెల్లడించారు. అయితే ఆ స్క్రూ పైల్ నీటిలో మునిగిపోయి ప్రస్తుతం బలహీనంగా మారిపోయిందని.. అందుకే దాన్ని తొలగించాల్సిన అవసరం వచ్చిందని చెప్పారు. ఇది రైళ్ల భద్రతకు సమస్యగా మారే అవకాశం ఉ‍న్నందున.. ఆ బ్రిడ్జిని ఇప్పుడు పునర్నిర్మిస్తున్నట్లు వివరించారు. ఈ 8 ఐరన్ పిల్లర్లు.. 9-10 మీటర్ల పొడవుతో 4 రైల్వే లైన్లను మోస్తూ సపోర్ట్‌గా ఉన్నాయని చెప్పారు.

ఇక ఈ రైల్వే బ్రిడ్జి ఉత్తర-దక్షిణ దిశలో దాదాపు 50-60 మీటర్ల పొడవు ఉండగా.. దానికి 7 సిమెంట్ గిర్డర్ల సపోర్ట్ దొరుకుతుంది. చర్చ్‌ గేట్ వైపు చివర నదిలో ఐరన్ పిల్లర్లు కూరుకుపోయి ఉన్నాయి. మిగిలిన ఐరన్ పిల్లర్లు సిమెంటు, కాంక్రీటు మధ్య ఉన్నాయి. ఇక స్క్రూ పైల్స్ చివరలు మాత్రమే పైకి కనిపిస్తూ ఉంటాయి. ప్రస్తుతం ఇంజనీర్లు.. మిథి నదిలోని నీటి ప్రవాహాన్ని ఆపడానికి తూర్పు, పడమర ఒడ్డున కాఫర్‌ డ్యామ్‌లను నిర్మించారు. ఇక ఐరన్ పిల్లర్లను తొలగించేందుకు వీలుగా అక్కడ నిలిచి ఉన్న నీటిని హై పవర్ పంప్‌ల సహాయంతో బయటకు తోడేస్తున్నారు.

ఇక ఈ రైల్వే బ్రిడ్జి పునర్మిర్మాణం సందర్భంగా.. ఆ మార్గంలో రైళ్ల రాకపోకలకు అంతరాయం కలగనున్నట్లు రైల్వే అధికారులు వెల్లడించారు. జనవరిలో పశ్చిమ రైల్వే రెండుసార్లు తొమ్మిదిన్నర గంటల చొప్పున.. ఆ మార్గంలో రైళ్లను నిలిపివేయనున్నట్లు అధికారులు తెలిపారు. పశ్చిమ రైల్వే అధికారులు తెలిపిన వివరాల ప్రకారం.. ఈ రైళ్ల నిలిపివేత జనవరి 24వ తేదీ నుంచి 26వ తేదీ వరకు రాత్రి 9.5 గంటల పాటు సాగనున్నట్లు సమాచారాం. ఈ సమయంలో ఆ మార్గంలో నడిచే రైళ్ల సర్వీసులను రద్దు చేయనున్నారు. ఈ రెండు సార్లు రైళ్లను నిలిపివేసిన సమయంలో ఇంజనీర్లు ఐరన్ పిల్లర్లపై ఉన్న స్టీల్ గిర్డర్లను తొలగించి.. వాటి స్థానంలో 20 మీటర్ల పొడవైన కాంక్రీట్ గిర్డర్లను ఏర్పాటు చేయనున్నారు.