by Suryaa Desk | Wed, Dec 25, 2024, 07:03 PM

నిర్మానుష్య ప్రదేశాలు, ఎవరూ లేని చోట్ల హత్యలు, అత్యాచారాలు, లైంగిక దాడులు జరగడం గురించి విన్నాం కానీ.. తాజాగా విశ్వవిద్యాలయంలో అత్యాచారం జరిగింది. ఇంజినీరింగ్ చదువుతున్న ఓ విద్యార్థినిపై ఇద్దరు నిందితులు అత్యాచారానికి పాల్పడ్డారు. దాన్ని సెల్‌ఫోన్‌లో చిత్రీకరించారు కూడా. ఈ విషయాన్ని ఎవరికైనా చెబితే.. వీడియోను సోషల్ మీడియాలో పెడుతామంటూ బెదిరించారు. అయినా బాధితురాలు ధైర్యంగా పోలీసులకు ఫిర్యాదు చేయడంతో.. ఆలస్యంగా ఈ అత్యాచార ఘటన వెలుగులోకి వచ్చింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

అన్నా యూనివర్సిటీలో ఇంజినీరింగ్ చదువుతున్న ఓ 19 ఏళ్ల విద్యార్థిని... రోజూలాగే డిసెంబర్ 24వ తేదీ సాయంత్రం క్యాంపస్ బయటకు వచ్చింది. అక్కడే స్నేహితుడు కనిపించగా అతడితో మాట్లాడుతోంది. అప్పుడు ఓ ఇద్దరు వ్యక్తులు వారి వద్దకు వచ్చారు. బాధితురాలి స్నేహితుడిని విపరీతంగా కొట్టి అక్కడి నుంచి అతడిని తరిమేశారు. ఆపై ఇద్దరూ కలిసి ఆమెపై అత్యాచారానికి పాల్పడ్డారు. ఒకరు ఈ రాక్షస క్రీడ జరుపుతుండగా.. మరొకరు వీడియో తీస్తూ రాక్షసానందం పొందారు. ఆపై ఈ విషయాన్ని ఎవరికైనా చెబితే ఆ వీడియోను సోషల్ మీడియాలో పెడతామంటూ బెదిరించారు.

ఆపై ఆమెను అక్కడే వదిలేసి నిందితులిద్దరూ పరారయ్యారు. దీంతో బాధిత మహిళ ఎలాగోలా కష్టపడి హాస్టల్‌కు చేరుకుంది. అత్యాచారానికి ముందు నిందితులు దాడి చేసిన తన స్నేహితుడికి ఫోన్ చేసింది. ఆపై తనకు జరిగిన అన్యాయం గురించి చెప్పి ఏడ్చింది. తనపై అఘాయిత్యానికి పాల్పడిన నిందితులకు కఠిన శిక్ష పడాలంటే తాను పోలీస్ స్టేషన్‌కు వెళ్లాలని.. అందుకు స్నేహితుడి సాయం కావాలని కోరింది. అతడు కూడా భయపడకుండా ముందడుగు వేయడంతో.. ఈరోజు ఉధయం పోలీస్ స్టేషన్‌కు వెళ్లారు.

దెబ్బలు తిన్న అతడితో పాటు అత్యాచార బాదితురాలు.. పోలీసులకు జరిగిందంతా చెప్పారు. ఇలా బాధితుల ఫిర్యాదుతో కేసు నమోదు చేసుకున్న పోలీసులు నిందితులను పట్టుకునేందుకు వెళ్లారు. ముఖ్యంగా సంఘటనా స్థలంలో ఉన్న సీసీ టీవీ ఫుటేజీని సేకరించి నిందితులను గుర్తించారు. ఆపై ఒకరిని పట్టుకున్నారు. అయితే నిందితుడు రోడ్లపై బిర్యానీలు అమ్ముకునే 37 ఏళ్ల జ్ఞానశేఖర్ అని తెలిపారు. మరో నిందితుడి పట్టుకునేందుకు మొత్తం 4 స్పెషల్ బృందాలు ముమ్మరంగా గాలిస్తున్నాయి.

అన్నా యూనివర్సిటీలో జరిగిన ఈ ఘటన గురించి తెలుసుకున్న బీజేపీ నాయకుడు అన్నామలై ఎక్స్ వేదికగా ఘటనను తీవ్రంగా ఖండించారు. రాష్ట్ర ముఖ్యమంత్రియే దీనికి బాధ్యత వహించాలంటూ డిమాండ్ చేశారు. బాధితురాలికి న్యాయం చేయాలని కోరారు. మరోవైపు మాజీ సీఎం ఎలప్పాడి పళనిస్వామి కూడా ఈ ఘటనను తీవ్రంగా ఖండించారు. ఈ ఒక్క ఘటనతో రాష్ట్రంలో శాంతి, భద్రతలు ఏ స్థాయిలో క్షీణించాయో అర్థం అవుతుందంటూ చెప్పుకొచ్చారు.