by Suryaa Desk | Sat, Jan 25, 2025, 08:39 PM

8

Authored byవంకం వెంకటరమణ | Samayam Telugu | Updated: 25 Jan 2025, 4:57 pm

Subscribe

ఎంవోయూలు చేసుకుంటే కంపెనీలు రావని.. నెట్ వర్క్ వల్లనే పరిశ్రమలు వస్తాయని దావోస్ పర్యటన గురించి వైసీపీ నేతలు చేస్తున్న విమర్శలపై ఏపీ సీఎం నారా చంద్రబాబు నాయుడు స్పందించారు.  ఏపీలో బీపీసీఎల్ ప్రాజెక్టు, అనకాపల్లిలో మిట్టల్ కంపెనీ పెట్టుబడులు, ఎన్టీపీసీ గ్రీన్ హైడ్రోజన్ హబ్ ఇలా ఇప్పటి వరకూ పది లక్షల వరకూ పెట్టుబడులు తెచ్చినట్లు చంద్రబాబు చెప్పారు. అలాగే ఏపీకి హైదరాబాద్ లేదన్న తెలంగాణ సీఎం రేవంత్ రెడ్డి వ్యాఖ్యలపైనా చంద్రబాబు స్పందించారు. తాను తెలుగు ప్రజల కోసమే హైదరాబాద్ అభివృద్ధి చేశానని.. దాని గురించి ఎవరు ఎలా చెప్పినా పర్లేదన్నారు. పెట్టుబడుల ఆకర్షణే ధ్యేయంగా తెలుగు రాష్ట్రాల ముఖ్యమంత్రులు ఇటీవల దావోస్ పర్యటనకు వెళ్లిన సంగతి తెలిసిందే. దావోస్‌లో జరిగిన ప్రపంచ ఆర్థిక సదస్సులో పాల్గొన్న ఏపీ ముఖ్యమంత్రి నారా చంద్రబాబు నాయుడు, తెలంగాణ సీఎం రేవంత్ రెడ్డి.. తమ, తమ రాష్ట్రాలలో పెట్టుబడులకు ఉన్న అవకాశాలు, ప్రభుత్వాలు అందిస్తున్న ప్రోత్సహకాల గురించి వారికి వివరిస్తూ కంపెనీలను ఆకర్షించే ప్రయత్నం చేశారు. అలాగే కొన్ని కంపెనీలతో ఒప్పందాలు కూడా కుదుర్చుకున్నారు. ఇక దావోస్ పర్యటన సందర్భంగా మహారాష్ట్ర ముఖ్యమంత్రి దేవేంద్ర ఫడ్నవీస్‌, తెలంగాణ ముఖ్యమంత్రి రేవంత్ రెడ్డి, ఏపీ సీఎం చంద్రబాబు నాయుడు కలిసి ఓ సమావేశంలో పాల్గొన్నారు. ఈ సందర్భంగా తాము ఏపీ, మహారాష్ట్రలతో పోటీ పడటం లేదని.. చైనాతో పోటీపడుతున్నామంటూ రేవంత్ రెడ్డి ఆసక్తికర వ్యాఖ్యలు చేశారు. అలాగే ఏపీకి హైదరాబాద్ లేదంటూ రేవంత్ రెడ్డి వ్యాఖ్యానించిన సంగతి తెలిసిందే.

ఈ క్రమంలోనే శనివారం జరిగిన మీడియా సమావేశంలో రేవంత్ రెడ్డి వ్యాఖ్యలపై విలేకర్లు చంద్రబాబును ప్రశ్నించారు. దావోస్ పర్యటన వివరాలు వెల్లడించేందుకు చంద్రబాబు శనివారం విలేకర్ల సమావేశం నిర్వహించారు. ఈ సందర్భంగా కొంతమంది మీడియా ప్రతినిధులు రేవంత్ రెడ్డి వ్యాఖ్యలపై చంద్రబాబును ప్రశ్నించారు. ఈ నేపథ్యంలో ఏపీకి హైదరాబాద్ లేదంటూ రేవంత్ రెడ్డి చేసిన వ్యాఖ్యలపై స్పందించిన చంద్రబాబు.. తెలుగు ప్రజలు, కమ్యూనిటీ కోసం తాను హైదరబాద్‌ను అభివృద్ధి చేశానని.. దాని గురించి ఎవరూ ఎలా చెప్పుకున్నా పర్లేదంటూ అభిప్రాయపడ్డారు.

మరోవైపు దావోస్ పర్యటనలో ఏపీ ప్రభుత్వం ఎంవోయూలు చేసుకోలేకపోయిందంటూ వైసీపీ చేస్తున్న విమర్శలపైనా చంద్రబాబు స్పందించారు. విమర్శలు చేసేవారు ఐదేళ్లలో రాష్ట్రానికి ఒక్క కంపెనీని అయినా తెచ్చారా అంటూ ప్రశ్నించారు. రాష్ట్రంలో కూటమి సర్కారు అధికారంలోకి రాగానే రూ.95 వేల కోట్లతో బీపీసీఎల్ రిఫైనరీ ప్రారంభం కాబోతోందన్నారు. దీనికి ఆరు నెలల్లో సమగ్ర ప్రాజెక్టు నివేదిక పూర్తి అవుతుందని చంద్రబాబు చెప్పారు. అలాగే అనకాపల్లిలో మిట్టల్ ప్లాంట్ వస్తోందన్నారు. కాకినాడకు గ్రీన్ ఎనర్జీ ప్లాంట్, విశాఖపట్నంలో గూగుల్ సెంటర్, టీసీఎస్ ఏర్పాటు కానున్నట్లు చంద్రబాబు చెప్పారు. కేవలం ఎంవోయూలు చేసుకుంటే కంపెనీలు వచ్చినట్లు కాదన్న చంద్రబాబు.. ప్రభుత్వం చేసే నెట్ వర్క్ వల్లనే భవిష్యత్తులో కంపెనీలు వస్తాయన్నారు.

ఏపీ రాజధాని అమరావతి పనులు మొదలయ్యాయన్న చంద్రబాబు.. కేంద్రం సహకారంతో అమరావతిని పూర్తిచేస్తామన్నారు. ఏపీ ప్రజల జీవనాడి పోలవరం ప్రాజెక్టుకు కేంద్రం ఇచ్చిన నిధులతో పనులు ప్రారంభమయ్యాయని.. వైజాగ్ స్టీల్ ప్లాంట్‌కు కూడా కేంద్రం ప్యాకేజీ ఇచ్చిన సంగతిని గుర్తుచేశారు. విశాఖ రైల్వే జోన్‌కు శంకుస్థాపన జరిగిందని.. త్వరలోనే పనులు కూడా మొదలుపెడతామని చెప్పారు. వైసీపీ హయాంలో ఏపీలో ధ్వంసమైన బ్రాండ్, వ్యవస్థలను ట్రాక్‌లో పెడుతున్నామని చంద్రబాబు చెప్పారు.