by Suryaa Desk | Wed, Mar 26, 2025, 11:10 PM

టీమిండియా స్పిన్నర్‌, ఐపీఎల్‌లో పంజాబ్ కింగ్స్ తరఫున ఆడుతున్న యుజ్వేంద్ర చాహల్‌.. ఇటీవల తన భార్య ధనశ్రీ వర్మతో విడాకులు తీసుకున్న విషయం తెలిసిందే. ఇటీవలే ధనశ్రీకి చాహల్ భారీగా భరణం చెల్లిస్తున్నాడంటూ వార్తలు సోషల్ మీడియాలో తెగ చెక్కర్లు కొట్టాయి. అయితే.. ఇప్పుడు మరో ఇంట్రెస్టింగ్ టాపిక్ వైరల్ అవుతోంది. 2020 సంవత్సరంలో వీరిద్దరూ వివాహం చేసుకున్నారు. ఐదేళ్ల తర్వాత అధికారికంగా విడాకులు తీసుకున్నారు. విడాకుల వార్తల మధ్య వీరిద్దరూ ఈ మధ్య ఎక్కువగా చర్చనీయాంశంగా మారారు. భరణం ఇన్ని కోట్లని? విడాకుల కారణాలు ఇవే? అనే చాలా మంది తమకు తోచినట్లు చెప్పారు.

అయితే చాహల్‌, ధనశ్రీల విడాకులకు కొత్త కారణం వెలుగులోకి వచ్చింది. ప్రముఖ ఎంటర్‌టైన్‌మెంట్ జర్నలిస్ట్ విక్కీ లాల్వానీ తాజా విషయాన్ని వెల్లడించారు. విక్కీ లాల్వానీ ప్రకారం, చాహల్, ధనశ్రీ మధ్య సంబంధంలో చీలిక రావడానికి ప్రధాన కారణం ముంబైకి మారడమే. పెళ్లయిన తర్వాత ధనశ్రీ వర్మ, చాహల్‌లు హర్యానాలో ఉండేవారు. చాహల్ పేరెంట్స్‌ కూడా అక్కడే ఉండేవారు.

కానీ ధనశ్రీకి ముంబైకి తమ నివాసాన్ని షిఫ్ట్ చేసుకోవాలని భావించింది. ఈ విషయాన్ని చాహల్‌తో చెప్పింది. అయితే చాహల్‌ మాత్రం ఇందుకు అస్సలు అంగీకరించలేదు. తల్లిదండ్రులను విడిచిపెట్టి రాలేనని తేల్చిచెప్పేశాడు. దీంతో వీరిద్దరి మధ్య అభిప్రాయ భేదాలు తలెత్తాయి. ఈ కారణంగానే వీరి మధ్య దూరం పెరిగింది. చివరకు అవే విడాకులకు కారణం అయ్యాయి.

కాగా యూట్యూబర్, డెంటిస్ట్, కొరియోగ్రాఫర్ అయిన ధనశ్రీ వర్మని యుజ్వేంద్ర చాహల్ 2020లో ప్రేమ వివాహం చేసుకున్నాడు. లాక్‌డౌన్ సమయంలో డ్యాన్స్ నేర్చుకునేందుకు వెళ్లి.. చాహల్ ఆమెతో ప్రేమలో పడ్డాడు. కాగా పెళ్లి తర్వాత వీరిద్దరూ సోషల్ మీడియాలో యాక్టివ్‌గా ఉంటూ ఫొటోలు, వీడియోలతో అలరించేవాళ్లు. చాహల్ ఆడే మ్యాచ్‌లకు ధనశ్రీ వర్మ హాజరై సందడి చేసేది. అలాగే ధనశ్రీ వర్మతో డ్యాన్స్ వీడియోలు చేస్తూ చాహల్ కూడా ఆమెకు సపోర్ట్‌గా నిలిచేవాడు. కానీ ఆ తర్వాత వీరిద్దరి మధ్య సంబంధాలు క్రమంగా క్షీణించాయి. ఇక యుజ్వేంద్ర చాహల్ ప్రస్తుతం ఐపీఎల్ 2025లో పంజాబ్ కింగ్స్ తరఫున ఆడుతున్నాడు. ఐపీఎల్ 2025 మెగా వేలంలో పంజాబ్ కింగ్స్.. అతడిని రూ.18 కోట్లు వెచ్చించి సొంతం చేసుకుంది.