by Suryaa Desk | Wed, Dec 10, 2025, 10:23 PM

లవంగాలు.. మన వంటగది పోపుల పెట్టెలో కచ్చితంగా ఉండాల్సిన సుగంధ ద్రవ్యం. మసాలా వంటకాలు, బిర్యానీలో లవంగాలు కచ్చితంగా వాడుతుంటాం. ఇవి వంటకు ప్రత్యేకమైన ఘాటు టేస్ట్‌, వాసన ఇస్తాయి. లవంగాలు వంటల్లో రుచి ఇవ్వడమే కాదు.. ఆరోగ్యానికి ఎంతో మేలు చేస్తుంది. లవంగాల్లో యాంటీ ఫంగల్, యాంటీ బాక్టీరియల్, యాంటీవైరల్, యాంటీ ఇన్ఫ్లమేటరీ, యాంటీఆక్సిడెంట్, యాంటీకార్సినోజెనిక్‌ లాంటి లక్షణాలు అనేకం ఉన్నాయి.

శీతాకాలం లవంగం టీ తీసుకుంటే శ్వాసకోశ ఆరోగ్యానికి, రోగనిరోధక శక్తి మెరుగుపరచడానికి సాయపడుతుందని చీఫ్‌ సర్జికల్‌ ఆంకాలజిస్ట్‌ డాక్టర్ ‌ మోహన్‌ వంశీ అన్నారు. ప్రతి రోజూ లవంగం టీ తీసుకుంటే ఎలాంటి ఆరోగ్య ప్రయోజనాలు జరుగుతాయో ఈ స్టోరీలో చూద్దాం.

శ్లేష్మం కరిగిస్తుంది

లవంగాల్లో ఉండే యూజినాల్ అనే సహజ ఆయిల్ శ్వాసనాళాల్లో పేరుకుపోయిన కఫాన్ని కరిగిస్తుంది. రెగ్యులర్‌గా లవంగ్ టీ తాగితే ఛాతీలో బిగుసుకుపోవడం, శ్వాస సరిగ్గా ఆడకపోవడం వంటి సమస్యలు దూరం అవుతాయి.

కాలుష్యం వల్ల వచ్చే వాపు తగ్గిస్తుంది

పట్టణాల్లో రోజూ ఎదురయ్యే పొగ, ధూళి శ్వాసనాళాల్లో ఇన్ఫ్లమేషన్‌ (వాపు) పెంచుతాయి. లవంగం టీలో యాంటీ ఇన్ఫ్లమేటరీ గుణాలు ఉంటాయి. ఇవి ఆ వాపును తగ్గించి ఊపిరితిత్తులు సహజ స్థితికి చేరేందుకు సాయపడతాయి.

దగ్గు, గొంతు ఇన్ఫెక్షన్ల నుంచి ఉపశమనం ఇస్తుంది

లవంగంలో యాంటీ బ్యాక్టీరియల్ గుణాలు ఉంటాయి. ఇవి బ్యాక్టీరియా, వైరస్‌లను సమర్థవంతంగా అడ్డుకుంటాయి. లవంగం టీ తీసుకుంటే దగ్గు, గొంతు నొప్పి, ఇన్ఫెక్షన్ల నుంచి త్వరగా రిలీఫ్ దొరుకుతుంది. ఇందులో ఉండే యాంటీ ఆక్సిడెంట్లు దగ్గు నుంచి ఉపశమనం కలిగించడమే కాకుండా శరీరంలో కఫాన్ని తొలగించేందుకు కూడా సహాయపడతాయి.

శ్వాసకోశ పనితీరును ప్రోత్సహిస్తుంది

మీరు దగ్గు, ముక్కు దిబ్బడతో ఇబ్బంది పడుతున్నారా? లవంగం టీ మీ వాయుమార్గాలను క్లియర్ చేస్తుంది. దీనిలోని యాంటీ ఇన్ఫ్లమేటరీ గుణాలు గొంతు నొప్పిని తగ్గిస్తాయి, శ్లేష్మాన్ని తొలగిస్తాయి. శ్వాస తీసుకోవడం సులభతరం చేస్తాయి. చల్లటి వాతావారణంలో ఈ టీ మీకు గొప్ప ఉపశమనం ఇస్తుంది.

రోగనిరోధక శక్తిని పెంచుతుంది

లవంగాలలోని యాంటీఆక్సిడెంట్లు, యాంటీమైక్రోబయల్ లక్షణాలు శరీరంలోని ఇన్ఫెక్షన్లతో పోరాడుతాయి. ఇది జలుబు, ఫ్లూ, శ్వాసకోశ వ్యాధులు, వైరల్ వ్యాధుల నుంచి సమర్థవంతంగా రక్షిస్తుంది. అలాగే శరీరానికి తక్షణ శక్తిని అందిస్తుంది.

ఊపిరితిత్తులకు మేలు చేస్తుంది

లవంగాల్లోని యూజీనాల్ ఊపిరితిత్తులు, వాయుమార్గాలలో వాపును తగ్గించడానికి సహాయపడతాయి. ఉబ్బసం, బ్రోన్కైటిస్ వంటి పరిస్థితుల లక్షణాలను సమర్థవంతంగా తగ్గిస్తుంది. యాంటీఆక్సిడెంట్లు అధికంగా ఉండే లవంగాలు, ఫ్రీ రాడికల్స్, పర్యావరణ కాలుష్య కారకాల వల్ల కలిగే నష్టం నుంచి ఊపిరితిత్తుల కణజాలాలను రక్షస్తాయి.

ఎలా తయారు చేసుకోవాలి?

గ్లాస్‌ నీళ్లో కొన్ని లవంగాలు, చిన్న అల్లం ముక్క, మిరియాలు, కొంచెం పసుపు వేసి ఐదు నిమిషాలు బాగా మరిగించండి. దీన్ని వడపోసుకుని గోరువెచ్చగా మీ లవంగం టీని ఎంజాయ్ చేయండి.