by Suryaa Desk | Sat, Dec 20, 2025, 11:08 PM

టీమిండియాలోకి రీ ఎంట్రీ ఇచ్చిన సంజు శాంసన్ సౌతాఫ్రికాపై ఆఖరి టీ20లో టాప్ ఫామ్‌తో రాణించాడు. ఓపెనర్‌గా తాను 100 శాతం ఫిట్‌గా ఉన్నానంటూ నిరూపించుకున్నాడు. శుభమన్ గిల్ గాయంతో జట్టుకు దూరమవ్వడంతో సంజుకి ఛాన్స్ దొరకగా, దాన్ని సద్వినియోగం చేసుకున్నాడు. అయితే, మ్యాచ్ అనంతరం తన ఓపెనర్ స్లాట్‌పై ఇర్ఫాన్ పఠాన్ అడిగిన ప్రశ్నలకు సంజు శాంసన్ నవ్వుతూనే దాటేశాడు.

అహ్మదాబాద్‌లో జరిగిన ఐదో టీ20లో సంజు శాంసన్ 22 బంతుల్లో 37 పరుగులు చేసి, టాప్ ఆర్డర్‌లో ఆడే అవకాశం ఇస్తే తాను ఏం చేయగలడో మరోసారి నిరూపించాడు. ఈ మ్యాచ్‌లో భారత్ 30 పరుగుల తేడాతో విజయం సాధించి సిరీస్‌ను 3-1తో కైవసం చేసుకుంది. ఆసియా కప్ 2025తో శుభ్‌మన్ గిల్ వైస్ కెప్టెన్‌గా భారత టీ 20 జట్టులోకి తిరిగి రావడంతో, సంజు శాంసన్ ఓపెనింగ్ స్థానం కోల్పోయాడు. దాంతో అతడిని మిడిల్ ఆర్డర్‌కు పంపారు. అక్కడ ఆశించిన పరుగులు రాకపోవడంతో, చివరకు సంజును తుది జట్టులో నుంచి తప్పించారు. అయితే గిల్ కూడా ఓపెనర్‌గా పెద్దగా ప్రభావం చూపలేకపోయాడు. ఆసియా కప్ నుంచి తిరిగి జట్టులోకి వచ్చిన తర్వాత ఇప్పటివరకు ఒక్క అర్ధశతకం కూడా చేయలేకపోయాడు. దక్షిణాఫ్రికాతో జరిగిన ఈ సిరీస్‌లో గిల్ మూడు మ్యాచ్‌లు ఆడి 4, 0, 28 పరుగులే చేశాడు. దీంతో సంజును పక్కన పెట్టడంపై విమర్శలు మరింత పెరిగాయి.

మ్యాచ్ అనంతరం జియో హాట్‌స్టార్‌లో ఇర్ఫాన్ పఠాన్, వరుణ్ ఆరోన్‌లతో మాట్లాడిన సంజు, జట్టు మేనేజ్‌మెంట్‌తో తనకు స్పష్టమైన కమ్యూనికేషన్ ఉందని చెప్పాడు. “ముందు పెద్ద టోర్నమెంట్ ఉంది. జట్టు వాతావరణం చాలా ముఖ్యం. నేను చాలా కాలంగా ఈ సిస్టమ్‌లోనే ఉన్నాను. కోచ్, కెప్టెన్ ఏం చేయాలని చూస్తున్నారో నాకు అర్థమవుతోంది. నేను అనుభవం ఉన్న ఆటగాడిని” అని సంజు అన్నాడు. “గౌతమ్ గంభీర్, సూర్యకుమార్ యాదవ్‌లతో నాకు మంచి సంబంధం ఉంది. వాళ్లతో కమ్యూనికేషన్ ఎప్పుడూ ఓపెన్‌గా ఉంటుంది” అని కూడా తెలిపాడు.

అయితే, రాబోయే న్యూజిలాండ్ సిరీస్‌లో సంజు ఓపెనర్‌గా ఆడతావా? అని ఇర్ఫాన్ పఠాన్ అడగడంతో, సంజు ఒక్కసారిగా నవ్వేశాడు. స్పష్టమైన సమాధానం ఇవ్వకుండా సరదాగా స్పందించాడు. “భయ్యా, మీరు కుదిర్చేస్తే నేను ఓపెన్ చేస్తా. నేను ఏమి చెప్పాలి చెప్పండి. ఇలాంటి ప్రశ్నలు అడగకూడదు ఇర్ఫాన్ భాయ్” అంటూ సంజు నవ్వేశాడు. ఈ సమాధానం అక్కడ ఉన్నవారందరినీ నవ్వించింది.