by Suryaa Desk | Fri, Jan 02, 2026, 03:33 PM

సంక్రాంతి పండుగ రాకముందే గోదావరి జిల్లాలు పందెం కోళ్ల కూతలతో మార్మోగుతున్నాయి. ఏటా జరిగే సంప్రదాయ కోడి పందేలకు ఈసారి సరికొత్త హంగులు వచ్చి చేరుతున్నాయి. జిల్లాలోని పలు ప్రాంతాల్లో ఇప్పటికే పంట పొలాలను చదును చేసి భారీ బరులను సిద్ధం చేస్తున్నారు. ఈసారి కేవలం పందేలే కాకుండా, వచ్చే వీఐపీల కోసం సకల సౌకర్యాలతో కూడిన ఏర్పాట్లు జరుగుతుండటం విశేషం.
బరుల వద్ద ఏర్పాటు చేస్తున్న వసతులు చూస్తుంటే ఇవి పందేలా లేక కార్పొరేట్ ఈవెంట్లా అన్నట్లుగా అనిపిస్తోంది. ఎండ వేడి తెలియకుండా ఉండేందుకు ఏసీలు, కూర్చోవడానికి సౌకర్యవంతమైన సోఫా సెట్లు, పందెం క్లియర్ గా కనిపించేలా భారీ ఎల్ఈడీ స్క్రీన్లను ఏర్పాటు చేస్తున్నారు. షామియానా నిర్వాహకులకు ఇప్పటికే వీటికి సంబంధించిన బుకింగ్స్ భారీగా రావడంతో వారు ఏర్పాట్లలో నిమగ్నమయ్యారు.
మరోవైపు, పందెం రాయుళ్లు తమ కోడిపుంజులను యుద్ధ వీరుల్లా తీర్చిదిద్దుతున్నారు. సాధారణ ఆహారం కంటే భిన్నంగా వీటికి జీడిపప్పు, బాదం, పిస్తా వంటి పోషకాహారాన్ని అందిస్తూ కంటికి రెప్పలా కాపాడుతున్నారు. కేవలం ఆహారమే కాకుండా, కోడిపుంజుల బలం పెంచడానికి వీటికి రోజూ ప్రత్యేక వ్యాయామాలు, ఈత వంటి శిక్షణలను కూడా ఇప్పిస్తూ బరిలో గెలుపే లక్ష్యంగా సిద్ధం చేస్తున్నారు.
పండుగ మూడు రోజులు గోదావరి తీరం కోలాహలంగా మారనుంది. ఊరు కాని ఊరు నుండి పందెం ప్రియులు తరలివస్తుండటంతో స్థానికంగా భారీగా వ్యాపార లావాదేవీలు జరిగే అవకాశం కనిపిస్తోంది. సాంప్రదాయానికి ఆధునికత తోడవ్వడంతో ఈసారి సంక్రాంతి పందేలు సరికొత్త రికార్డులను సృష్టించేలా ఉన్నాయి. అయితే పోలీసులు నిబంధనల విషయంలో ఎలా వ్యవహరిస్తారనేది ఇప్పుడు ఆసక్తికరంగా మారింది.