by Suryaa Desk | Mon, Jan 05, 2026, 09:20 PM

వెనుజులాలో అధికారాన్ని అమెరికా చేజిక్కించుకోవడం, ఆ దేశ అధ్యక్షుడు నికోలస్ మదురోను అపహరించడంపై చైనా స్పందించింది. ‘ఇతర దేశాల అభివృద్ధి మార్గాన్ని గౌరవించడంలో’ ప్రధాన శక్తులు ముందుండాలని పిలుపునిచ్చిన చైనా అధ్యక్షుడు షీ జిన్‌పింగ్ ... పరోక్షంగా అమెరికాపై విమర్శలు చేశారు. చాలా కాలం నుంచి చైనా, వెనుజులా మధ్య సంబంధాలు బలపడుతున్నాయి. అంతేకాదు, వెనుజులాకు చైనా అతిపెద్ద చమురు కొనుగోలుదారు. ‘ఈ శతాబ్దంలో ఎన్నడూ చూడని మార్పులు, అల్లకల్లోలాలకు ప్రపంచం లోనవుతోంది.. ఏకపక్ష, బెదిరింపు చర్యలు అంతర్జాతీయ క్రమాన్ని తీవ్రంగా దెబ్బతీస్తున్నాయి’ అని చైనా అధినేత షీ జిన్‌పింగ్ విమర్శించారు. వెనుజులాపై వాషింగ్టన్ దాడిని ఇంతకు ముందే చైనా తీవ్రంగా విమర్శించగా.. తాజాగా ఆ దేశ అధ్యక్షుడు దీనిపై స్పందించారు.

‘‘ఇతర దేశాల ప్రజలు స్వతంత్రంగా ఎంచుకునే అభివృద్ధి మార్గాలను అన్ని దేశాలూ తప్పనిసరిగా గౌరవించాలి..అంతర్జాతీయ చట్టాలు, ఐక్యరాజ్యసమితి చార్టర్ లక్ష్యాలు, సూత్రాలను పాటించాలి, మఖ్యంగా అగ్రరాజ్యాలు ఈ విషయంలో ముందుండి నడవాలి’’ అని ఇర్లాండ్ ప్రధాన మంత్రి మైఖేల్ మార్టీన్‌తో సమావేశం సందర్భంగా జిన్‌పింగ్ ఈ వ్యాఖ్యలు చేశారు. కాగా, విదేశీ శక్తుల ఒత్తిడి లేకుండా ఇతర దేశాలతో ఆర్థిక సంబంధాలను కొనసాగించే హక్కు వెనుజులాకు ఉందని చైనా ఇంతకు ముందే ఉద్ఘాటించింది. అంతేకాదు, మదురో, ఆయన భార్యను అమెరికా తక్షణమే విడుదల చేయాలని కోరింది.

ఓ సౌర్వభౌమ ప్రభుత్వంపై అమెరికా బలవంతపు చర్యలు దిగ్భ్రాంతికి గురిచేశాయని, వీటిని తీవ్రంగా ఖండిస్తున్నామని పేర్కొంది. ‘ఈ చర్యలు అంతర్జాతీయ చట్టాలు, అంతర్జాతీయ సంబంధాల ప్రాథమిక నిబంధనలు, ఐక్యరాజ్యసమితి లక్ష్యాలు, సూత్రాలను స్పష్టంగా ఉల్లంఘించడమే’ అని పేర్కొంది. వెనుజులా మాదిరిగానే కొలంబియా, మెక్సికో వంటి మిగతా లాటిన్ దేశాలు కూడా మాట వినకుంటే మదురో పరిస్థితే వస్తుందని డొనాల్డ్ ట్రంప్ బెదిరింపులకు దిగిన విషయం తెలిసిందే. కాగా, మదురో ప్రభుత్వాన్ని కూలదోసి, ఆయనను అరెస్ట్ చేయడం చైనాకు ఒక విధంగా భారీ ఎదురుదెబ్బే. హ్యూగో చావెజ్ వారసుడిగా మదురో అధికారం చేపట్టిన తర్వాత నుంచే చైనా, వెనుజులా మధ్య బంధం మరింత బలపడింది.

గత రెండు దశాబ్దాలు వెనిజులాతో బీజింగ్ వ్యూహాత్మక భాగస్వామ్యం రాజకీయ ఏకాభిప్రాయం, ఇంధన సహకారం, లాటిన్ అమెరికాలో అమెరికా, పాశ్చాత్య దేశాల ప్రభావానికి ఉమ్మడిగా వ్యతిరేకతపై నిర్మితమైంది. ఈ కాలంలో అమెరికా ఆంక్షలు ఉన్నప్పటికీ, వెనిజులా చమురుకు ప్రధాన కొనుగోలుదారుగా చైనా అవతరించింది. వెనిజులాకు ప్రధాన పెట్టుబడిదారు, అతిపెద్ద రుణదాత కూడా చమురు హామీతో పదుల బిలియన్ల డాలర్ల రుణాలను అందించింది.