by Suryaa Desk | Mon, Jan 05, 2026, 09:31 PM

అంతర్జాతీయ రాజకీయాల్లో పెను సంచలనం సృష్టించిన వెనిజులా ఆపరేషన్ తర్వాత అమెరికా అధ్యక్షుడు డొనాల్డ్ ట్రంప్ మరోసారి గర్జించారు. వెనిజులాలో తమ మాట వినకపోతే 'రెండో దశ' దాడులకు సిద్ధంగా ఉన్నామని హెచ్చరించారు. అధ్యక్షుడు నికోలస్ మదురోను నాటకీయంగా బంధించి అమెరికాకు తరలించిన తర్వాత.. ఇప్పుడు వెనిజులా భవిష్యత్తు తమ చేతుల్లోనే ఉందని ట్రంప్ స్పష్టం చేయడం ప్రపంచ వ్యాప్తంగా చర్చనీయాంశమైంది.

మర్యాదగా ఉండండి.. లేదంటే దెబ్బ తప్పదు!

సోమవారం తెల్లవారుజామున మీడియాతో మాట్లాడిన ట్రంప్.. వెనిజులాలోని తాత్కాలిక నాయకత్వానికి సీరియస్ వార్నింగ్ ఇచ్చారు. "ప్రస్తుతానికి అక్కడ అంతా మా నియంత్రణలోనే ఉంది. ఒకవేళ వారు సరిగ్గా ప్రవర్తించకపోతే .. వెనిజులాపై రెండోసారి మెరుపు దాడి చేయడానికి మేం ఏమాత్రం వెనుకాడబోం" అని ఆయన తేల్చి చెప్పారు. రెండో ఆపరేషన్‌కు అమెరికా సైన్యం ఇప్పటికే సిద్ధంగా ఉందనీ, అయితే మళ్లీ దాడి చేయాల్సిన అవసరం రాకూడదని తాను కోరుకుంటున్నట్లు ట్రంప్ పేర్కొన్నారు.

వెనిజులాను చనిపోయిన దేశంగా అభివర్ణించిన ట్రంప్.. ఆ దేశ పతనం వెనుక ఏళ్ల తరబడి జరిగిన అవినీతి, నిర్వహణ లోపాలే కారణమని విమర్శించారు. అయితే వెనిజులా వద్ద ఉన్న అపారమైన చమురు నిల్వలను పునరుద్ధరించడమే తన లక్ష్యమని ప్రకటించారు. "అక్కడ చమురు ఉత్పత్తి చాలా తక్కువ స్థాయిలో ఉంది. మా చమురు కంపెనీలు అక్కడికి వెళ్లి బిలియన్ల డాలర్ల పెట్టుబడితో విచ్ఛిన్నమైన మౌలిక సదుపాయాలను బాగు చేస్తాయి. వెనిజులా వనరులపై మాకు పూర్తి హక్కులు కావాలి" అని ట్రంప్ తన ఆర్థిక ప్రయోజనాలను బహిరంగంగానే వెల్లడించారు.

అమెరికా చేపట్టిన ఈ సైనిక చర్యపై అంతర్జాతీయంగా భిన్నాభిప్రాయాలు వ్యక్తం అవుతున్నాయి. స్పెయిన్, బ్రెజిల్, మెక్సికో వంటి దేశాలుఅమెరికా తీరును ఖండిస్తూ.. ఇది ప్రాంతీయ భద్రతకు ముప్పు అని హెచ్చరించాయి. మరోవైపు కొలంబియా అధ్యక్షుడు గుస్తావో పెట్రో.. వెనిజులా సరిహద్దు వెంబడి ఏకంగా 30,000 మంది సైనికులను మోహరించి అప్రమత్తం చేశారు. వెనిజులా రాజధాని కరాకస్‌లో ప్రజలు భయంతో నిత్యావసర వస్తువుల కోసం సూపర్ మార్కెట్ల ముందు బారులు తీరుతున్నారు.