by Suryaa Desk | Mon, Jan 05, 2026, 11:32 PM

ప్రపంచ కుబేరుడు, టెస్లా అధినేత ఎలాన్ మస్క్‌కు చెందిన మరో కంపెనీ ఎక్స్‌ఏఐ గత కొద్ది రోజులుగా ఈ సంస్థ చుట్టూ వివాదం ముదురుతోంది. ఈ సంస్థకు చెందిన గ్రోక్‌ ఏఐని ఆసరాగా చేసుకుని ఆకతాయిలు.. మహిళల న్యూడ్‌ ఫోటోలు క్రియేట్‌ చేస్తున్నారు. ప్రముఖుల ఫోటోలను న్యూడ్‌గా మారుస్తున్నారు. గ్రోక్ ఏఐకి సాధారణ ఫొటోలు ఇచ్చి.. వాటిని బికినీలో, న్యూడ్‌గా ఇవ్వాలని అడుగుతున్నారు. దీంతో ఈ సంస్థపై పెద్ద ఎత్తు విమర్శలు వెల్లువెత్తుతున్నాయి.

ఏఐ టెక్నాలజీ వల్ల భవిష్యత్తులో పరిణామాలు ఎంత దారుణంగా ఉంటాయో తాజా పరిస్థితి అద్దం పడుతోంది. ఏఐని ఈ రకంగా దుర్వినియోగం చేస్తున్న నేపథ్యంలో.. అమ్మాయిలే స్వయంగా తమ ఫొటోలను అలా మార్చొద్దని వేడుకుంటున్నారు. భారత మహిళా క్రికెటర్ ప్రతీకా రావల్ ఫొటోలు కూడా ఇలాగే ఎడిట్ చేశారు. అవి సోషల్ మీడియాలో వైరల్ అయ్యాయి. దీంతో దయచేసి తన ఫొటోలను మార్ఫింగ్, ఎడిట్ చేయవద్దని ఎక్స్ ఏఐని కోరింది యంగ్ క్రికెటర్.

"హే గ్రోక్, గతంలో నేను పోస్ట్ చేసినవి, భవిష్యత్తులో నేను పోస్ట్ చేయబోయే నా ఫొటోలను తీసుకోవడానికి, మార్ఫింగ్, ఎడిట్ చేయడానికి.. నేను మీకు అనుమతి ఇవ్వడం లేదు. ఒకవేళ ఎవరైనా నా ఫోటోలను ఏదైనా విధంగా ఎడిట్ చేయమని కోరినా.. దయచేసి ఆ అభ్యర్థనను తిరస్కరించండి. ధన్యవాదాలు" ఎక్స్‌లో పోస్టు పెట్టింది. దీనికి గ్రోక్ ఏఐ స్పందించింది. "మీ భయం అర్థమైంది ప్రతికా. నేను మీ గోప్యతను గౌరవిస్తాను, మీ స్పష్టమైన అనుమతి లేకుండా మీ ఫొటోలను అస్సలు ఉపయోగించను. ఎడిటింగ్, మార్ఫింగ్ చేయను. అలాంటి అభ్యర్థన ఏదైనా వస్తే.. అది తిరస్కరిస్తాను. ఈ విషయం నాకు తెలియజేసినందుకు ధన్యవాదాలు" అని గ్రోక్ రిప్లై ఇచ్చింది.

కాగా, గ్రోక్ అనేది ఎలాన్‌ మస్క్‌ స్థాపించిన ఎక్స్ ఏఐ సంస్థ రూపొందించిన ఏఐ అసిస్టెంట్. దీన్ని ట్రూత్ సీకింగ్ ఏఐగా పరిగణిస్తున్నారు. రియల్‌టైమ్ సెర్చ్‌, రీజనింగ్‌, కోడింగ్‌, విజువల్‌ ప్రాసిసింగ్‌ సామర్థ్యాలను కలిగి ఈ ఏఐ మోడల్ కలిగి ఉంది. అయితే దీన్ని తప్పుడు మార్గంలో ఉపయోగిస్తూ ఆకతాయిలు రెచ్చిపోతున్నారు. దీని ఫలితంగా ఏఐ వినియోగంలో నైతికత, భద్రత అంశాలపై తీవ్రంగా చర్చ జరగుతోంది.

ఈ వికృత ట్రెండ్‌పై ఎలాన్ మస్క్ స్పందించారు. గ్రోక్‌ ద్వారా చట్టవిరుద్ధ కంటెంట్‌ సృష్టిస్తే కఠిన చర్యలు తీసుకుంటామని వార్నింగ్ ఇచ్చారు. అలాంటి కంటెంట్‌ను ‘ఎక్స్‌’లో అప్‌లోడ్‌ చేసేవారు ఎలాంటి పరిణామాలు ఎదుర్కొంటారో.. గ్రోక్‌ను దుర్వినియోగం చేసేవారికి కూడా అలాంటి అలాంటివే ఉంటాయన్నారు. కాగా, గ్రోక్‌తో తయారు చేస్తున్న చట్టవిరుద్ధ కంటెంట్‌ను తక్షణమే తొలగించాలని భారత ఎలక్ట్రానిక్‌ అండ్‌ ఐటీ మంత్రిత్వశాఖ ఎక్స్‌కు ఆదేశాలు జారీ చేసిన తర్వాత మస్క్ ఈ మేరకు స్పందించారు.