by Suryaa Desk | Tue, Jan 06, 2026, 11:42 PM

శరీరాన్ని ఆరోగ్యంగా ఉంచడానికి ఆహారం పట్ల ప్రత్యేక శ్రద్ధ వహించాలి. రోజువారీ ఆహారంలో ఆకుపచ్చ కూరగాయలు, తృణధాన్యాలు, పండ్లు, గింజలు, విత్తనాలు వంటి వాటిని యాడ్ చేసుకోవాలి. వీటిని తినడం ద్వారా అనేక తీవ్రమైన వ్యాధుల్ని నివారించవచ్చు. ఇక, చలికాలంలో ఎక్కువగా దొరికే ముల్లంగి కూడా ఆరోగ్యానికి మేలు చేసే కూరగాయల వరసలో ముందుంటుంది. ముల్లంగి కూర, సూప్, పచ్చడి, ముల్లంగి సాంబార్ ఆరోగ్యానికి ఎంతో మేలు చేస్తాయి.

​ముల్లంగిలో ఫైబర్, విటమిన్ సి, ఫోలిక్ యాసిడ్, కాల్షియం, యాంటీ ఆక్సిడెంట్లు పుష్కలంగా ఉన్నాయి. ఇవి శరీరాన్ని నిర్వీషకరణ చేయడానికి, జీర్ణక్రియ మెరుగుపర్చడానికి, రోగనిరోధక శక్తి పెంచడానికి సాయపడతాయి. ఇలా చెప్పుకుంటే పోతే బోలెడు ఆరోగ్య ప్రయోజనాలు ముల్లంగిలో ఉన్నాయి. అయితే, కొందరు ముల్లంగిని ఎట్టి పరిస్థితుల్లో తినకూడదని ఆయుర్వేద డాక్టర్ వినోద్ శర్మ చెబుతున్నారు. వాళ్లు ఎవరో ఇప్పుడు చుద్దాం.

థైరాయిడ్ సమస్యతో బాధపడేవారు

ఈ రోజుల్లో చాలా మంది థైరాయిడ్ సమస్యతో బాధపడుతున్నారు. ముఖ్యంగా మహిళలు ఈ సమస్యకు గురవుతున్నారు. థైరాయిడ్‌తో బాధపడేవారు పచ్చి ముల్లంగి తినకూడదని డాక్టర్ వినోద్ శర్మ చెబుతున్నారు.

ముల్లంగిలో గాయిట్రోజెన్ అనే పదార్థం ఉంటుంది. ఇది థైరాయిడ్ సమస్యల్ని మరింత తీవ్రతరం చేస్తుంది. ఇది శరీరం అయోడిన్ శోషణను నిరోధిస్తుంది. ఇది థైరాయిడ్ సమస్యల్ని మరింత తీవ్రతరం చేస్తుంది. థైరాయిడ్ రోగులు వైద్యుణ్ని సంప్రదించకుండా పచ్చి ముల్లంగి అస్సలు తినకూడదని చెబుతున్నారు.

లోబీపీ సమస్యతో బాధపడేవారు

​లోబీపీ సమస్యతో బాధపడేవారు ముల్లంగి తినే విషయంలో చాలా జాగ్రత్తగా ఉండాలని డాక్టర్ చెబుతున్నారు. ముల్లంగిలో ఎక్కువ మొత్తంలో పొటాషియం ఉంటుంది. ఇది శరీరంలో సోడియం స్థాయిల్ని తగ్గిస్తుంది. దీంతో రక్తపోటు తగ్గించడంలో సాయపడుతుంది. అయితే, ఇప్పటికే తక్కువ రక్తపోటుతో బాధపడుతున్నవారు దీనిని తింటే తలతిరగడం, అలసట, బలహీనత సమస్యల్ని ఎదుర్కోవచ్చు. ఇది అధిక రక్తపోటుతో బాధపడేవారికి మంచి కూరగాయ.

పిత్తాశయంలో రాళ్లతో బాధపడేవారు

పిత్తాశయ రాళ్ళు ఉన్నవారు ముఖ్యంగా ముల్లంగి తినకుండా ఉండాలని నిపుణులు చెబుతున్నారు. ముల్లంగి తినడం వల్ల పిత్త స్రావం పెరుగుతుందని అనేక అధ్యయనాలు సూచిస్తున్నాయి. మీరు కూడా గాల్‌బ్లాడర్ స్టోన్స్ సమస్యతో బాధపడుతుంటే ముల్లంగిని తినకపోవడమే మేలు అంటున్నారు. ముల్లంగి తినడం వల్ల పెరిగిన స్రావం నొప్పిని పెంచుతుంది. అంతేకాకుండా మీ అసౌకర్యాన్ని మరింత తీవ్రతరం చేస్తుంది.

కడుపులో గ్యాస్, ఉబ్బరం సమస్య ఉన్నవారు

ముల్లంగి జీర్ణక్రియకు సాయపడినప్పటికీ.. గ్యాస్ ట్రబుల్‌తో బాధపడేవారు ముల్లంగి తినకుండా ఉండాలని నిపుణులు చెబుతున్నారు. ముల్లంగి తినడం వల్ల గ్యాస్ ఎక్కువైపోతుంది. కడుపులో చికాకు వస్తుందని నిపుణులు చెబుతున్నారు. అంతేకాకుండా యాసిడ్ రిఫ్లక్స్ లేదా గుండెల్లో మంటతో బాధపడేవారు కూడా ముల్లంగిని తినకూడదు.

దీనిని తినడం వల్ల కడుపు నొప్పిని ఎదుర్కోవచ్చు. ముల్లంగి జీర్ణం కావడానికి చాలా సమయం తీసుకుంటుంది. ఇది కడుపులో గ్యాస్ సృష్టించడానికి పనిచేస్తుంది. మీరు ఇప్పటికే అల్సర్, గ్యాస్ ట్రబుల్, అజీర్ణం వంటి సమస్యలతో బాధపడుతుంటే ముల్లంగి తినడం మానుకోండి.

వీళ్లు కూడా తినకూడదు

​కీళ్ల నొప్పులతో బాధపడేవారు, యూరిక్ యాసిడ్ ఉన్న రోగులు కూడా ముల్లంగి తినకూడదని డాక్టర్ చెబుతున్నారు. ముల్లంగి చల్లదనాన్ని కలిగిస్తుంది. మీకు ఇప్పటికే ఆర్థరైటిస్, కీళ్ల నొప్పులు లేదా అధిక యూరిక్ యాసిడ్ స్థాయిలు ఉంటే, ముల్లంగి తినడం వల్ల నొప్పి, వాపు మరింత తీవ్రమవుతాయి.

హైపోగ్లైసీమియాతో బాధపడేవారు కూడా ముల్లంగి తినే విషయంలో జాగ్రత్తగా ఉండాలి. రక్తంలో తక్కువ చక్కెర స్థాయిలు ఉంటే ఆ పరిస్థితిని హైపోగ్లైసీమియా అంటారు. ముల్లంగిలో రక్తంలో షుగర్ స్థాయిల్ని తగ్గించే లక్షణాలు ఉన్నాయి. మీరు ఇప్పటికే మందులు తీసుకుంటుంటే.. ముల్లంగి తీసుకోవడం వల్ల రక్తంలో చక్కెర స్థాయిలు ప్రమాదకరంగా పడిపోతాయి.